भांगरभूंय | प्रतिनिधी
पणजी : म्हापशें, दोना पावला दरोडा प्रकरणांत अटक जाल्ले टोळयेंतले वांगडी दरोड्या पयलीं त्या वाठाराचो अभ्यास करताले. त्या वाठारांत लोक केन्ना न्हिदतात, केन्ना उठतात हाचो ते अभ्यास करताले. हाका लागून तांकां त्या वाठारांत लोक केन्ना चड नासतात हाची म्हायती मेळटाली. हे म्हायती प्रमाण ते दरोडो घालताले, अशी म्हायती गुन्यांव अन्वेशण खात्याचे अधिक्षक राहुल गुप्ता हांणी दिली. शुक्रारा पणजे जाल्ले पत्रकार परिशदेंत ते उलयताले. ह्या वेळार पुलीस महासंचालक आलोक कुमार आनी हेर अधिकारी हाजीर आशिल्ले.
गुप्ता हांणी सांगलें, दोनूय दरोड्या प्रकरणांत पुलिसांनी आतां मेरेन पांच जाणांक ताब्यांत घेतल्यात. दरोड्याविशीं मुळावी चवकशी सुरू जाल्या. हातुंतलो एक आरोपी नदीम खान हाका ह्यान पयलींच २०२२ वर्सा फोंडें एटीएम चोरी प्रकरणांत धरिल्ले. तो कोलवाल बंदखणींत आसतना तांणी आपलें नेटवर्क तयार केलें. टोळयेंतल्या हेर वांगड्यांक गोंयां विशीं म्हायती दिवपाचें काम तांणीच केलें. दोना पावला प्रकरणांत नदीमाक कळंगूटे रावपी मेहमूद ( उत्तर प्रदेश) हांणी मजत केल्ली. उपरांत मेहमूद हाकाय अटक केल्ली.
आरोपी सैफुल बेंगळूर कांय काळ रावतालो. ताका मजत करपी राजू बी आनी सफीकुल हांकांय अटक जाल्या. बांगलादेशी टोळयेची वांगडी सारको अभ्यास करतना दोन ते तीन गटांत भोंवताले. दिसभर अभ्यास करून सांजेवेळार ते एकठांय येवन एकामेकांक म्हायती दिताले. अभ्यासा मजगतीं ते त्या वाठारांतलीं रानां, दर्यादेगो अश्या सुवातांचेर लिपून रावताले. तांणी थळाव्या बाजारांतल्या हातोडी, सुरी अशीं हत्त्यारां मेळयिल्लीं. हीं हत्त्यारां तांकां कोणें दिलीं हाचो तपास सध्या पुलीस करतात.
ही टोळी दर स म्हयन्यांनी बांगलादेशांतल्यान भारतांत येवन विवीध राज्यांनी दरोडे घालताले. गोंय पुलिसांनी दरोड्या उपरांत टोळी मेघालया मार्गान बांगलादेशांत पावली. तशेंच परत भारतांत येवपा खातीरूय मेघालय मार्गाचो वापर केलो. गोंय पुलिसांनी हीं दोनूय प्रकरणां गंभीरपणे घेतल्यां. दरोडो पडले उपरांत २४ वरांनी आमकां आरोपींची वळख पटिल्ली. मात हैदराबादाक सीसीटीव्ही फुटेज मेळूंक नाशिल्ल्यान तेे आमच्या हातांतल्यान सुटून गेल्ल्याचें गुप्ता हांणी सांगलें.
पुलीस महासंचालक अलोक कुमार हांणी, ह्या दोनूय प्रकरणांत गोंय पुलिसांनी बीएसएफ, बंगाल, आंध्र प्रदेश, तेलंगणा, दिल्ली पुलिसां वांगडा बरो समन्वय दवरिल्लो. हाका लागून आरोपींक धरप शक्य जालें. ही टोळी २०१० सावन देशांतल्या विंगड विंगड राज्यांनी दरोडे घालताली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
