भांगरभूंय | प्रतिनिधी
काकोडा: सांगें-कुडचडें मार्गार परत एक फावट वाहन चलयतना मोबायल वापरिल्ल्यान अपघात जालो. हाका लागून वाहन चलयतना मोबायल वापरपाचो प्रस्न परत एक फावट मुखार आयला. काकोड्यां दुचाकी चालकाचें मोबायलाचेर उलयतना पयलीं दुचाकीवेल्यान नियंत्रण गेलें, उपरांत तांणी दुसरे लेनींत वचून गाडयेक नेटान धपको दिलो. ह्या अपघातांत दुचाकीचालक जखमी जाल्ल्यान ताका काकोडेंच्या भलायकी केंद्रांत उपचारा खातीर दाखल केला.
हे विशीं मेळिल्ले म्हायती प्रमाण, संबंदीत दुचाकीचालक वाहन चलयतना मोबायलाचेर उलयतालो. मोबायलावेल्या उलोवपाक लागून ताचें लक्ष गेलें आनी नकळटां ताणें दुचाकी चुकीचे वटेन वळयली. हाका लागून मुखारच्यान येवपी गाडयेचेर नेटान धपको बसलो. ह्या अपघातांत दोनूय वाहनांचें लुकसाण जालें. हे घडणुकेची म्हायती मेळटांच पुलीस रोखडेच घडणुके सुवातेर पावन पंचनामो केलो.
थळाव्या नागरिकांनी दिल्ले म्हायती प्रमाण, ह्या रस्त्याचेर फाटल्या कितल्याशाच दिसां सावन विवीध कामां सुरू आसा. हाका लागून वाहन चालकांक पयलींच कांय प्रमाणांत आडखळी जाणवतात. अशे स्थितींत गाडी चलयतना अदीक सतर्कताय बाळगप गरजेचें आसता. मात मोबायल वापरिल्ल्यान जाल्लो हो अपघात चालकाचे बेजापसालदारकेचेर उजवाड घालता. निश्काळजीपणाक लागून स्वताचो आनी हेरांचोय जीव धोक्यांत घालप योग्य न्हय, अशी प्रतिक्रिया थळाव्यांनी उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
