भांगरभूंय | प्रतिनिधी
मुंबय : सेगीत आयिल्ल्या सुटयांक लागून लोक व्हडा प्रमाणांत घरांतल्यान भायर सरल्यात. हाका लागून गोंय- मुंंबय महामार्गाचेर येरादारीची व्हड कोयंडी जाल्या. कोकणांत वचपी मार्गार वाहनांच्यो रांको लागिल्ल्यो पळोवपाक मेळटात. नागोठणे लागसार कोकणा कडेन वचपी रस्त्याचेर वाहनां कोयंडींत आडकलीं. हाका लागून वाहनांची व्हड रांक लागली.
वाकण फाटो ते कामत हॉटेल मजगतच्या बऱ्याच किलोमीटरां मेरेन वाहनां आडकल्यांत. वाहनांची स्पिड देंवल्या. कांय कडेन वाहनांक फुडें वचपा खातीर वरांचीं वरां वाट पळोवची पडटा. सेगीत तीन दिसांच्यो सुटयो आनी महाराष्ट्र दिसाक लागून पर्यटक व्हडा प्रमाणांत कोंकणाचे दिकेन वतात. हाका लागून अचकीत वाहनांचो आंकडो ह्या मार्गाचेर वाडला. महामार्गावेल्या अर्दवट कामाक लागून येरादारीचो वेग उणो जाला.
तशेंच वाहन चालक मोडपी नेम, बेशिस्त पार्कींग, ओव्हरटेकिंगाक लागून वाहन कोंडीत चड भर पडटा. सध्या येरादारी पुलीस जाल्ली कोयंडी सुरळीत करपाचो यत्न करता. मात हांगा वाहनांचे वाडपी गर्देक लागून समस्या निर्माण जाल्या.
प्रशासनाचीं मार्गदर्शक तत्वां
मजगतीं, येरादारी कोयंडीचे फाटभूंयेर प्रशासनान कांय मार्गदर्शक तत्वां जाहीर केल्यांत. गर्देच्या वेळार प्रवास टाळचो, वाहन चालकांनी पर्यायी मार्गाचो वापर करचो आनी कोकणांत वचपी प्रवाशांनी जाय तितलो वेळ घेवन प्रवास करोच असो उलो मारला.
सेगीत सुटयो आशिल्ल्यान फुडले कांय दीस अशीच कोयंडी कायम उरपाची शक्यताय आशिल्ल्यान वाहन चालकांनी जतनाय घेवपाचो उलो मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
