भांगरभूंय | प्रतिनिधी
पणजी : केंद्र सरकारान लागू केल्ले चार नवे कायदे कामगारांच्या आड आसा. हे काळे कायदे बेगोबेग रद्द करचे अशी मागणी ऑल इंडिया ट्रेड युनियन कॉंग्रेसचे (आयटक) गोंयचे सरचिटणीस ख्रिस्तोफर फोन्सेका हांणी केली. शुक्रारा आंतरराष्ट्रीय कामगार दिसा निमतान आयोजीत केल्ले बसकेंत ते उलयताले. ह्या वेळार प्रसन्ना उटगी, ऍड. सुहास नायक, राजू मंगेशकार हांचे सयत राज्यभरचे शेकड्यांनी कामगार हाजीर आशिल्ले. ताचे पयलीं कदंब बसस्टॅण्ड ते पणजी चर्च वाठारा मजगतीं कामगारांचो मोर्चा काडलो.
फोन्सेका हांणी सांगलें, न्या कामगार कायद्याक लागून कामगारांक संप करपाचो अधिकार उरचो ना. कायद्यांत कंत्राटी पद्धती चालीक लायिल्ल्यान कामगारांच्या नोकर्यांची सुरक्षितता धोक्यांत आयल्या. ह्या कायद्याक लागून ट्रेड युनियनाकूय निश्क्रीय करपाचो हेतू आसा. हाका लागून हे कायदे रद्द जावंक जाय. तशेंच अकुशल कामगारांचो म्हयन्याचो पगार उण्यात उणो ३० हजार रुपया करप, फार्मसी क्षेत्रात एस्मा लागू करचे न्हय, पंचायत कर्मचार्यांक सातवो वेतन आयोग लागू करप, अंगणवाडी सेविकांक सेवेंत नियमित करप अश्यो मागण्योय केल्यो.
कदंब कर्मचार्यांचें प्रलंबीत वेतन तशेंच प्रॉव्हिडंट फंडांतलो फरक दिवपाची मागणी आमी केल्या. न्हंय परिवहन खात्यांतल्या कर्मचार्यांक प्रलंबीत ओवर टायम दिवप, पीडब्ल्यूडी कामगार सोसायटीच्या कर्मचार्यांक सेवेंत कायम करप, संजीवनी साखर कारखान्याच्या कर्मचार्यांच्यो मागण्यो पुराय करप, वीज खात्यांतली रिती सुवात भरप, स्मार्ट मिटरची सक्ती करप ना अश्यो मागण्योय आमी केल्यात. सरकारान गोंयच्या पर्यावरणाची राखण करप गरजेचें. हांगच्या परंपरीक वेवसायिकांक संरक्षण दिवपाचीय जापसालदारकी सरकाराची आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
