भांगरभूंय | प्रतिनिधी
पणजीः अर्थीक गुन्यांव विभागांत फाटलीं सात वर्सां ५०० ते १ हजार कोटी रुपयांचीं फटवणुकेचीं प्रकरणां नोंद जाल्यांत. नोंदणी कृत संस्था आसले बगर लावाच्या हावेसाक बळी पडून गुंतवणूक करुं नाकात. पदवी शिक्षण पांवड्यार अर्थीक साक्षरताय सुरू करतले, अशें मुख्यमंत्री डॉ प्रमोद सावंत हांणी सांगलें.
पणजे गोंय मनरजीवण संस्थेचे मॅकनेजी पॅलेसींत फ्युचर वेल्थ गोवा परिशद २०२६च्या उक्तावणा वेळार मुख्यमंत्री डॉ. प्रमोद सावंत उलयताले. ह्या वेळार जीसीसीआयची अध्यक्ष प्रतिमा धोंड आनी हेर मानेस्त हजर आसले.
तुमचे पयशे डबल करुन दिवपाचे, गुंतवणुकीचेर ६ टक्के जुर दिवपाचे ह्या हायसांक लोक कितलेशेच बळी पडल्यात आनी तांचे पयशे घेवन हे गुन्यांवकार लंडन, दुबय आनी हेर राज्यांनी वचून बसल्यात, अशें मुख्यमंत्र्यान सांगलें.
पयशे गेले उपरांत लोक उरफाटें सरकाराच्या नांवान शंख ठोकतात. पयलीं गुंतवणूक लिपोवन करताक आनी सरकाराक कसलीच कल्पना दिनात. जर पयल्याच पांवड्यार कागाळ केल्ली जाल्यार तेन्नाच तांकां भितर उडयतले आसले. गोंयकारां कडेन पयशे भरपूर आसात मात नाका थंय गुंतवणूक करूं नाकात, असो सल्लो मुख्यमंत्र्यान दिला.
५० हजार पसून ते ५ कोटी रुपया वगडावन बशील्ले लोक हांवें पळयल्यात. फाटल्या सात वर्सांच्या काळांत ५०० कोटी ते हजार कोटी क्रिप्टो आनी फोरेक्स भितर गुंतवणूक नीधीन घालून लोकांची फटकूण जाल्या. गोंयकारांनी सादूर रावचें. आपली गुंतवणूक गरज नासातना असल्या फंडांनी करची न्हय, असो उलो मुख्यमंत्र्यान मारला.
पदवीधर पांवड्यार आमकां अर्थीक साक्षर करपाक जाय. सगळ्या भुरग्यांक अर्थीक साक्षर करप काळाची गरज आसा. देखून अर्थीक साक्षरतायेचे पयलीं प्रशिक्षण शिक्षकांक दिवन पदवीधर पांवड्यार सुरू केले उपरांत तें मुळाव्या पांवड्यार व्हरपाचें हांवें थारयलां. हें केलें जाल्यारच अर्थीक फटणूक बंद जातली, अशीं म्हायती मुख्यमंत्र्यान दिली.
गोंयचे सुमार १५ लाख जनते खातीर राज्यांत ८०७ बँकेचे फाटे आसात. हाचो अर्थ दरेक शार वा गांवांत एक बँकेचो फांटो आसा. प्रधानमंत्री जन धन येवजणे खाला सरकारान २.६ लाख सामन्य बँक खाती उक्ती केल्यांत आनी खात्यांत मेळून ११९२ कोटी रुपया जमा जाल्यात. तशेंच विवीध बँकांनी गांवांगावांनी ९६६ अर्थीक साक्षरताय शिबिरां घडोवन हाडल्यां, अशी आंकडेवारी मुख्यमंत्र्यान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
