भांगरभूंय | प्रतिनिधी
घुडी पाडवो हो उत्सव वसंत ऋतूक येवकार दिता. भारतांतल्या वेगवेगळ्या वाठारांनी वेगवेगळ्या नांवान हो सण मनयतात. कोंकणींत ताका संवसार पाडवो अशेंय म्हण्टात. हिंदू पंचांगा प्रमाण गुडी पाडवो हो चैत्र म्हयन्याचो पयलो दीस.
ब्रह्मपुराणांत ह्या उत्सवाचें म्हत्व अशें सांगलां की “जायत्या वर्सां पयलीं धर्तरेचेर व्हड हुंवार आयिल्लो. काळ थांबलो आनी दरेक जीव आनी सैम नश्ट जाल्लो. ह्याच दिसा भगवान ब्रह्मान नवो संवसार निर्माण करपाक सुरवात केली. घुडी पाडव्या साकुन परतून काळ सुरू जालो आनी ताणें सत्य आनी न्यायाच्या नव्या युगाची तोखणाय केली, जाका सतयुग अशें म्हण्टात.” देखून घुडी पाडव्याक ब्रह्मदेवाची पुजा करतात.
घुडी पाडव्या फाटल्यान आनीक एक कथा आसा. अशें म्हण्टात की होच दीस भगवान राम 14 वर्सां वनवासांत रावन अयोध्येक परतलो. त्या दिसा ताचो राजा म्हूण राज्याभिशेक जालो. लोकांनी घराच्या प्रवेशद्वाराचेर उंच घुडी लावन ताका येवकार दिलो. अयोध्येंत भगवान रामाक फावो जाल्ल्या जैताचो ध्वज म्हूण ही घुडी हिंदूंक उगडास करून दिता.
घुडी उबारपाची परंपरा कोणे सुरू केली? घुडी वा जैताचो ध्वज उबारपाची परंपरा नामनेचे झुजारी छत्रपती शिवाजी महाराज हाणींय सुरू केल्ली अशें म्हण्टात.आतां दर एक हिंदू आपल्या घरांत तिचें पालन करता. घराच्या भायर कोंड्याचेर कापड, तांबयो, फुलां, कोडू लिंबाचीं पानां लावन उबारिल्ली ‘घुडी’ जैताच्या ध्वजाचें प्रतिनिधित्व करता आणि जैताचें प्रतीक सदांच उंच दवरचें, अशें सुचयता.
अक्षदा सावंत देसाय
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.