भांगरभूंय | प्रतिनिधी
अंदूं काजीचें पीक ५० टक्क्यांनी देवलें
वाळपय, प्रतिनिधी: अंदूं काजू मौसमांत पुरायेन लुकसाण जालां. अंदूं काजीचें पीक ५० टक्क्यांनी देंवलां. मदींच पावस पडिल्ल्यान ताचो वायट परिणाम काजू बागायतीचेर जालो. उपरांत परत पावस पडलो आनी काजू बागायतीचेर हाचो परिणाम जाल्ल्याचें स्पश्ट जाणवलें. ताका लागून अंदूं ५० टक्क्यांनी काजीचें उत्पादन उणें जालां. देखून उत्पादकांचें अर्थीक वेवस्थापन हाडपाची शक्यताय न्हयकारूं येना. म्हणून सरकारान काजूचो दुश्काळ जाहीर करचो आनी काजू उत्पादकांक व्हडा प्रमाणांत अर्थीक मजत दिवची अशी मागणी काजू उत्पादकांनी केल्या.
मुख्यमंत्री प्रमोद सावंत आनी कृषिमंत्री रवी नायक हांणी कांय दिसां पयलीं हे विशीं घोशणा केल्ली. मात, हाची अंमलबजावणी बेगीन करची आनी काजू उत्पादकांक समाधानी करचे अशी मागणी सत्तरी म्हालांतले काजू उत्पादक करतात. हे विशीं म्हायती अशी, सत्तरी म्हालांत व्हडा प्रमाणांत काजू बागायती आसात. दोंगराळ आनी समांतर जाग्यार व्हडा प्रमाणांत काजीची लागवड केल्या. दर वर्सा हे लागवडींत भर पडटा. सत्तरी म्हालांतली सुमार ७० टक्के जनता आजूनय काजीच्या उत्पादनाचेर आपलें पोट चलयता. मात अंदूं काजीच्या उत्पादनाक पुरायेन लुकसाण जालां. हवामानांत सेगीत बदल जाल्ल्यान ताचो वायट परिणाम काजीचे बागायतीचेर जाला. मदींच दोन फावटी पावस पडलो. हाचोय परिणाम काजू बागायतीचेर जालो. ताका लागून सत्तरी म्हालांतल्या जायत्या कुटुंबियांचेर हाचो परिणाम जाल्लो दिसतलो. हाका लागून सरकारान काजू दुश्काळ जाहीर करचो आनी काजू उत्पादकांक सुशेग दिवपाची मागणी काजू उत्पादकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
