भांगरभूंय | प्रतिनिधी
पणजी, बातमीदार ः गोंयांत 11 ते 14 मे ह्या काळांत कांय सुवातींनी पावस पडपाची शक्यताय हवामान खात्यान उक्तायल्या. तशेंच आयज आनी फाल्यां हवामान उश्ण आनी दमट उरपाची शक्यताय आसा. फुडले सात दीस चडांत चड तापमान 34 ते 36 अंश सेल्सियस मदीं उरपाची शक्यताय आसा. जाल्यार 8 ते 10 मे मेरेन वातावरण सुकें उरतलें असो अदमास खात्यान उक्तायला.
हवामान खात्यान दिल्ले म्हायती प्रमाण, राज्यांतल्या फुडल्या पांच दिसांत चडांत चड तापमानांत व्हडलोसो बदल जावपाची शक्यताय ना. मंगळारा राज्यांतल्या वेगवेगळ्या सुवातींनी चडांत चड तापमान 33 ते 35 अंश सेल्सियस मेरेन नोंद जालें. पणजीत बुधवारा चडांत चड तापमान 34.2 अंश सेल्सियस आनी उण्यांत उणें तापमान 25.5 अंश सेल्सियस नोंद जालां. मुरगांवांत चडांत चड तापमान 33.8 अंश आनी उण्यांत उणें तापमान 26.6 अंश सेल्सिअस आसा.
पणजेंत ओलसाण 75 टक्के जाल्यार मुरगांवांत 77 टक्के ओलसाण आशिल्ली. फुडल्या सात दिसांत ओलसाण 80 ते 90 टक्क्यांमदीं आसपाची शक्यताय आसा. ह्या सात दिसांत उश्णताय निर्देशांक म्हळ्यार जाणवपी तापमान 40 अंश सेल्सियस सकयल उरपाची शक्यताय खात्यान उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
