भांगरभूंय | प्रतिनिधी
पणजी : आदले मंत्री चर्चिल आलेमांव हांणी आयज सकाळीं पत्रकार परिशद घेवन क्रिस्तांव समाजांतल्या लग्नांक रातचें उसरां मेरेन लावड स्पिकरांक परवानगी दिवची, अशी मागणी केल्ली. राज्यांत सगळ्याच सुवाळ्यांक लावड स्पिकर लावपाची परवानगी दिता. मात, केंद्रीय आवाजाचें प्रदूशण कायद्या प्रमाण रातच्या १० वरां उपरांत लावड स्पिकर लावपाचेर बंदी आसा. गोंय पर्यटन राज्य. गोंयांक ‘वेडिंग डेस्टिनेशन’ म्हणून प्रमोट करपाचें आसल्यार सकारात्मक विचार करप गरजेचें. ताका लागून हो कायदो सुदारपाची गरज आसा, अशें मुख्यमंत्री डॉ. प्रमोद सावंत हांणी म्हणलें.
दनपरां पणजे हांगा पत्रकारांनी विचारिल्ल्या प्रस्नाक जाप दितना मुख्यमंत्री उलयताले. सावंड प्रूफ जाग्यांचेर लावड स्पिकरांची वेळाची मर्यादा रातच्या १० वरां उपरांत वाडोवपा विशीं विचार सुरू आसा, अशें मुख्यमंत्र्यान म्हणलें.
राज्य प्रदूशण नियंत्रण मंडळाचे मजतीन लावडस्पिकरांच्या वेळा मर्यादेंत कांय बदल करपाचे विचार करतात. तशेंच आमी बंद केल्ल्या आनी उक्त्या मैदानाचेर जावपी सुवाळ्यांनी बदल करून काळमर्यादे विशीं बदल करूं येता काय, हे विशीं विचार करतात. हो प्रस्न बेगीनूच सोडोवपाचो आमी यत्न करतात, अशें मुख्यमंत्र्यान सांगलें.
मजगतीं, राज्यांत क्रिस्तांव धर्मीयांचे लग्न सुवाळे रातचे उसरां सोंपतात. ह्या वेळार नाच, गीता चालू आसतात. मात रातच्या १० वरांचेर लावडस्पिकर लावपाक बंदी आशिल्ल्यान हे सुवाळे बेगीनूच सोंपोवचे पडटात. आदीं चर्चिल आलेमाव हांचे सयत राज्यांतल्या हेर क्रिस्तांव धर्मीय आमदारांनी ही काळ मर्यादा बदलपाची मागणी केल्ली. लोकसभा वेंचणुकेच्या प्रचारांत साश्टींतल्या कांय आमदारांनी ह्या प्रस्ना वयल्यान सरकाराचेर टिकाय केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
