भांगरभूंय | प्रतिनिधी
पणजी, बातमीदार : गोंयांत लोकसभेक बरें मतदान जालां. हाचो फायदो भाजपाक जातलो. हाका लागून उत्तर गोंयच्यान श्रीपाद नायक १ लाख जाल्यार दक्षिणेंतल्यान पल्लवी धेंपो ६० हजार मतांनी जैतिवंत जातली , असो दावो मुख्यमंत्री डॉ. प्रमोद सावंत हांणी केला. बुधवारा पणजे जाल्ले पत्रकार परिशदेंत ते उलयताले. ह्या वेळार प्रदेशाध्यक्ष तशेंच राज्यसभा खासदार सदानंद शेट तानावडे आनी उत्तर गोंयचे उमेदवार श्रीपाद नायक हाजीर आशिल्ले.
राज्यांत उश्णताय आसून लेगीत मतदार मतदाना खातीर घरा भायर सरले. हे वेंचणुकेंत कॉंग्रेस पक्ष उदरगती विशीं कांयच उलयना. तांणी फकत धर्माच्या, जातीच्या नांवान समाजांत फूट घालपाचो यत्न केलो. भाजपाचेर आनी म्हजेर फटींग आरोप केले. नावें समाजांत फूट घालपाचो यत्न केलो. एसटी वा ओबीसी समाजांतल्या दोगांक फुडें करून पुराय समाज भाजपा आड आसा, अशें दाखोवपाचो यत्न केलो. आतां मतदार विशेश करून नवे मतदार हुशार जाल्यात. तांणी कॉंग्रेसीचें फुटीचें राजकारण स्वीकारूंक ना, अशेंय मुख्यमंत्र्यान म्हणलें.
हे वेंचणुके उपरांत कॉंग्रेस पक्ष फकत चार मतदासंघां पुरतोच उरला. उत्तर गोंयांत भाजपा २० मतदासंघांत जाल्यार दक्षिणेंत १४ मतदारसंघात मुखार उरलो. दक्षिणेंत आमी ६ मतदारसंघांत मात्शे उणे पडले. तरी सांगें, सावर्डे, मडकय, काणकोण, शिरोड्यां ह्या मतदासंघांतल्यान मेळपी आघाडेक लागून आमी तें भरून काडटले, असो विस्वास मुख्यमंत्र्यान उक्तायलो.
तानावडे हांणी, मतदार कॉंग्रेसीच्या दुबाळ्या राजकारणाक जाप दितले. तांकां तांचो जागो दाखोवन दितले असो विस्वास तांची उक्तायलो.
श्रीपाद नायक हांणी मतदारांचे उपकार मानले. ही आपली निमाणी वेंचणूक. हें पक्षाक कळयलां. ते मिाणो निर्णय घेतलें अशें तांणी स्पश्ट केलें.
वेंचणूक जावन सगळे इंडी आघाडीक विसरतले. तांतले आपचे दिल्लीचे मुख्यमंत्रीच बंदखणींत आसात. ताका लागून ह्यान फुडें ही आघाडी आनीक उरची ना. हे विशीं कॉंग्रेसीन तयारी सुरू केल्या. जाल्यार हेर एका पक्षाचे फुडारी चडूच तिडकल्ले. तांका कॉंग्रेस पक्षाक ‘टेकओव्हर’ करपाचें आसूं येता, अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
