भांगरभूंय | प्रतिनिधी
मडगांव, प्रतिनिधी : राज्यांतल्या क्रिस्तांव धर्मियांच्या लग्न सुवाळ्यांक रातच्या १२ वरां मेरेन परवानगी दिवची. १० वरां मेरेनच्या वेळाचे मर्यादेंत वाड जावप गरजेचें. मुख्यमंत्री डॉ. प्रमोद सावंत हांणी केंद्रा कडेन चर्चा करुन ही मागणी मान्य करून दिवची अशी मागणी आदले मंत्री चर्चिल आलेमाव हांणी केली.
पत्रकार परिशद घेवन चर्चिल आलेमाव हांणी क्रिस्तांव लग्न सुवाळ्याच्या वेळांत वाड करून घेवपाची मागणी आनी मुख्यमंत्री सावंत हांचे कडेन केंद्रा कडल्यान परवानगी घेवपाची तांक आसा अशें सांगलें.
आदले मुख्यमंत्री मनोहर पर्रीकार हांचे उपरांत मुख्यमंत्री प्रमोद सावंत हांणी राज्यांत केंद्रा कडल्यान व्हडा प्रमाणात निधी हाडलो आनी उदरगतीचीं कामां केल्यांत. हिंदू, मुस्लीम आनी क्रिस्तांव अश्या सगळ्या धर्मीयांच्या लग्न सुवाळ्यांक जाय तो गरजेचो वेळ मेळपाची गरज आसा. क्रिस्तांव धर्माच्या लग्नांक रातचें उसरां मेरेन नाच, गितां चालूच आसतात. मात वेळाचे मर्यादेक लागून लग्न सुवाळो रातच्या १० वरां मेरेन सोंपोवचो पडटा. ताका लागून आवाजाच्या मर्यादेच्या निर्बंधांत वाड जावपाची गरज आसा. मुख्यमंत्र्यान केंद्र सरकारा कडेन हे विशीं चर्चा करून वाड करून घेवपाची गरज आसा. केंद्र सरकार मुख्यमंत्र्यांक ना म्हणचें ना अशेंय तांणी म्हणलें.
आपल्याक प्रचाराक आपोवंक ना
आपूण आदलो मंत्री तशेच आदलो खासदार आशिल्ल्यान आपल्याक कॉँग्रेसीन प्रचारा खातीर आपोवंक ना. आपणें भाजपान प्रवेश करूंक ना. आपल्याक लोकांचें फाटबळ आसा. कोणेंच आपल्याक प्रचाराक आपोवंक ना अशें तांणी म्हणलें.
ईव्हीएम मशीन बंद पडिल्ल्या प्रकाराचेर उलयतना तांणी, २०१४ त आपणें मशिनाचेर आक्षेप घेतिल्लो. मात त्या वेळार आपल्याक कोणेंच साथ दिवंक ना. आतां जें कितें घडटा ताचेर आपूण कांयच उलोवचो ना, अशेंय आलेमाव हांणी म्हणलें.
राज्यांतली लोकसभा वेंचणुकांच्या मतदाना उपरांत कोण जिंकतलो हे विशीं विचारलें तेन्ना तांणी, जाका लोकांचें फाटबळ आसतलें तो जिखतलो अशें सांगलें आनी ह्या विशयाचेर आनीक उलोवपाचें ना अशें सरळ सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
