भांगरभूंय | प्रतिनिधी
नवी दिल्ली, खबरां संस्था: एअर इंडिया एक्स्प्रेस सामकार व्हड संकट निर्माण जालां. एअर इंडियाच्या २०० वरिश्ठ क्रू-मेंबर्सांनी एकाच वेळार सीक लिव्ह घेतिल्ल्यान ८० परस चड विमानां रद्द करचीं पडलीं. हाका लागून प्रवाशांक विमानतळार येवचे पयलीं फ्लायटची म्हायती घेवपाचो सल्लो दिला. केबीन- क्रू, कर्मचारी नाशिल्ल्यान खुबशीं विमानां उडपाचीं रद्द करचीं पडल्यांत. विमानां रद्द जाल्ल्यान प्रवाशांक पुराय परतावो दितले अशें एअर लायन्सान स्पश्ट केलें.
तिकेटीचें रिफंड पुरायेन दितले
टाटा ग्रुपाची एअरलायन्स एअर इंडियांतल्या खुबश्या जाणांनी वांगडांच सुटी घेतिल्ल्यान विमान उड्डाणां रद्द करचीं पडलीं. हे विशीं उलयतना एअर इंडियाच्या प्रवक्तान सांगलें, आमच्या खुबश्या कर्मचार्यांनी मंगळारा सुटी घेतल्या. ताका लागून विमानां उडपाक उशीर जाता. कांय विमानां रद्द करचीं पडलीं. प्रवाशांची गैर वेवस्था जावची न्हय देखून आमी आमच्या क्रू मेंबर्सां वांगडा चर्चा करतात. विमानांचें उड्डान रद्द जाल्ल्यान प्रवाशांनी काडिल्ल्या तिकेटांचो रिफंड तांकां पुराय मेळटलो. तशेंच आनीक कसलेंच शुल्क दिनासतना तुमचो प्रवास रिशेड्यूल्ड करूं येता. तशेंच बुधवारा विमानतळार वयचे पयलीं एअरलाईन्साक संपर्क करुन फ्लायटा विशीं म्हायती घेवची, असो उलो विमान कंपनीन दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
