भांगरभूंय | प्रतिनिधी
पणजी, प्रतिनिधी : गोंयांत विधानसभेच्या तुळेंत लोकसभे खातीरचे मतदान उणें जावपाची प्रथा हे खेपे पसून कायम तशीच उरली. उपलब्ध नोंदी प्रमाण, फांटले (2022) विधानसभा वेंचणुकेंत 79.61 टक्के मतदान जाल्ले. विधानसभे उपरांत दोन वर्सांनी मंगळारा जाल्ले लोकसभा वेंचणुकेंत 75.20 टक्के मतदान जालां. हें प्रमाण 4 टक्क्यांनी उणें आसा.
लोकसभा वेंचणुके खातीर तिसऱ्या पांवड्यार हेर राज्यां सयत गोंयांत मंगळारा मतदान जालें. वेंचणूक आयोगान मतदानाचें प्रमाण 80 टक्क्यां मेरेन व्हरपाचें उदिश्ट दवरिल्लें. तें पुराय करपाक कांय प्रमाणात अपेस आयला.
2019 वर्साच्या (फांटली) लोकसभा वेंचणुकेंत 76.4 टक्के मतदान जाल्ले. ही टक्केवारी सुद्धा गांठपाक हे खेपे अपेस आयलें. 2014 वर्सा जाल्लें लोकसभा वेंचणुकेंत 77.06 टक्के मतदान जाल्ले. 2014 वर्साच्या लोकसभा वेंचणुके उपरांत 2017 वर्सा जाल्ले विधानसभा वेंचणुकेंत 82.56 टक्के मतदान जाल्लें. वेंचणुके गणीक मतदानाचे प्रमाण गोंयांत तरी वाडूंक ना. तशेंच विधानसभेच्या तुळेंत लोकसभेक राज्यांत उणें मतदान जाता. हे विशींचें कारण आतांच सांगप शक्य जावचें ना, अशे वेंचणूक आयोगाच्या अधिकाऱ्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
