भांगरभूंय | प्रतिनिधी
घुंंवळे वखदांच्या गुन्यांवांनी उणाव जाल्ल्याचो सरकाराचो दावो
पणजी : घुंंवळे वखदां आड पुलिसांंची कारवाय नेटान सुरू आसा. हाका लागून घुंवळे वखदांंच्या गुन्यांवांनी उणाव जाला. समाज घुंवळे वखदां पसून मुक्त जावचो म्हूण सगल्यांनी एकठांंय येवन यत्न करपाची गरज आसा अशें मुख्यमंंत्री डॉ. प्रमोद सावंंत हांंणी सांगलें.
दर वर्सा 26 जून हो दीस संंवसारीक घुंंवळे वखदां विरोधी दीस म्हूण मनयतात. ह्या दिसा निमतान समाज घुंंवळे वखदां सावन मुक्त करपाचो संंदेश मुख्यमंंत्री डॉ. प्रमोद सावंंत हांंणी दिला. मुख्यमंंत्री म्हणटात, पुराय संंवसाराक घुंंवळे वखदांंचो विळखो आसा. घुंवळे वखदांंक झिरो टोलरन्स हें गोंंय पुलिसांंचें धोरण आसा. ह्या धोरणांत कसलोच बदल जावचो ना. घुंंवळे वखदां विक्रेत्यांंचेर सेगीत कारवाय सुरूच आसा. ते भायर घुंवळे वखदांंची पुरवण करपी पेडलरांंचेर लेगीत कारवायो जाल्यात. हाका लागून राज्यांत घुंंवळे वखदांंच्या गुन्यांवाचें प्रमाण देंवलांं, असो दावो मुख्यमंंत्र्यांंनी संंदेशात केला. तरणाट्यांंच्या फुडारा खातीर घुंंवळे वखदां सावन समाजाक मुक्त करपाची सगल्यांची जापसालदारकी आसा, असो उलो मुख्यमंंत्र्यांंनी मारलाे.
जागृताये खातीर पुलिसांंची दौड
संवसारीक घुंंवळे वखदां विरोधी दिसा निमतान घुंंवळे वखदां विरोधी फांट्याच्या पुलिसांंनी खासा दौड (धांवप) आयोजीत केल्ली. बांबोळी डॉ. श्यामाप्रसाद मुखर्जी स्टेडीयम ते पणजी फेरीबोटी मेरेन दौड जाली. पुलीस तशेंच कांय नागरिकांंनी हातूंत वांटो घेतलो. ‘से नो टु ड्रग्ज’ असो संंदेश ह्या वेळार दिलो. घुंवळे वखदांंचो वेव्हार दिसून आयालो जाल्यार पुलिसांक म्हायती दिवची, अशें आवाहन पुलीस अधिक्षक निधीन वाल्सन हांंणी केलां.
2021 उपरांंत 408 कील घुंवळे वखदां जप्त केल्यात. हातूंत चरस, गांंजाे, कोकेन, एलएसडी, एक्स्टासी गुळयो हांंचो आस्पाव आसा. जप्त केल्ल्या घुंंवळे वखदांंचें मोल 10 कोटी रुपया आसा. हणजूणें, कळंंगूट, शिवोली, बागा, हरमल ह्या वाठारांनी घुंंवळे वखदां मेळपाचें प्रमाण चड आसा.
घुंंवळे वखदांंच्या वेव्हारांत 25 टक्के गोंयकारांक अटक
घुंंवळे वखदांंच्या वेव्हारांत विदेशी नागरिकांंचो हात आसता. मुंबय तशेंच दाबोळी विमानतळार लेगीत घुंंवळे वखदांं सयत विदेशी नागरिकांंक अटक जाल्या. गोंंय हें फामाद पर्यटन थळ आसा. घुंंवळे वखदांंच्या वेव्हारांत खूबशे खेपे पर्यटकांंक अटक जाल्या. पुलिसांं कडल्यान मेळिल्ले म्हायती प्रमाण 2021 उपरांंत घुंंवळे वखदांंच्या वेव्हारांत 403 जाणांक अटक जाल्या. हातूंत 103 गोंंयकार आसात. हें प्रमाण 25 टक्के जाता. 61 विदेशी नागरीक आसात. 243 जाण हेर राज्यांतले आसात. घुंंवळे वखदांंच्या वेव्हारांत विदेशी नागरिकांं परस देशी नागरीक चड आसात, अशें आंकडेवारी वेल्यान स्पश्ट जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
