भांगरभूंय | प्रतिनिधी
संवसार पाडवो हो सण संवसारीक विचार मुखार घेवन आयज मनोवया. आपलो संवसार म्हळ्यार फकत आपलो वाठार न्हय. ताचो आंवाठ संवसाराच्या शीमे मेरेन वाडोवया.
आयज संवसार पाडवो. योगायोग म्हळ्यार आयज संवसारीक कोंकणी दीस आनी कोंकणीचो म्हापुरूस शणै गोंयबाब हांची पुण्यतीथ. कोंकणी संवसाराक जाणी परतून संजीवनी दिली आनी कोंकणी मनशाचो स्वाभिमान जागो करपाक लागून आपले व्हड योगदान दिलें अश्या पुण्यात्म्याक, शणै गोंयबाबाक आमीं कोंकणी मनीस आयज पयलें नमन करतात. कोंकणी संवसार आयज पुराय जगभर पाताळिल्लो दिश्टी पडटा. कोंकणी अस्मिताय आनी कोंकणी भास आयज जैताची घुडी संवसाराच्या तेंगशेर उबी करताना पुराय विश्व पळयता. कोंकणी म्हळ्यार फकत कोंकणी साहित्यूच न्हय, जाल्यार कोंकणी म्हळ्यार कोंकणी भाशेक आपल्या अभिव्यक्तीचे माध्यम करपी दरेक कोंकणी मनशाची भास. दरेक कोंकणी मनशाची संस्कृताय. कोंकणी आयज संवसारभर गाजता. कोंकणी मायेची सासाय व्हड आनी अजरंवर.
संवसार पाडव्याक घुडी पाडवो अशेंय म्हणटात. हो पाडवो वसंत ऋतूचो उत्सव आसून तो आमच्या पोरण्या अश्या दायजाच्या हिंदू लोकां खातीर नव्या वर्साची सुरवात आसा. मुखेलपणान महाराष्ट्र, गोंय हांगा आनी भोंवतणचे वाठारांत हो उत्सव चैत्राच्या सुरवेक, लूनिसोलर हिंदू पंचांगाच्या पयल्या म्हयन्यांत मनयतात. ह्या उत्सवाचें खाशेलपण म्हळ्यार एक खाशेली घुडी; जी फुलां, आंब्या ताळो , कडूलिंबां पानां घालून तांचीं माळ करून एके बडयेक कापड, साडी वा आनीक कसलेय रंगीत सोवळे वस्त्र बांदतात. तांब्याचो तांबयो ताचेर उरफाटो करून घालतात. अशें तरेन दारा मुखार घुडी उबी करतात. हीं घुडी घराब्याच्या समृद्धतायेचे आनी जैताचे प्रतिक.
संवसार पाडव्याक वसंत ऋतूक येवकार आनी रबी पिकांची कापणी. ह्या उत्सवाचो संबंद त्या पौराणीक दिसा कडेन आसा, ज्या दिसा ब्रह्मान काळ आनी विश्वाची निर्मिती केल्ली अशें म्हणटात. कांय जाणांक ह्या चैत्र म्हयन्यांत अयोध्येंत जाल्ल्या श्रीरामाच्या राज्याभिषेकाची तशेंच शालिवाहन पंचांगाची सुरवात जाल्ल्याची याद जाता. म्हटल्यारूच बऱ्या सुरवातेची हीं म्हुर्त वेळ.
संवसार पाडवो हो सण संवसारीक विचार मुखार घेवन आयज मनोवया. आपलो संवसार म्हळ्यार फकत आपलो वाठार न्हय. ताचो आंवाठ संवसाराच्या शीमे मेरेन वाडोवया. सगलो संवसार हेंच आपले कुटुंब ह्या विचाराक परतून जग भूंयेर रूजवणाक घालूया. विज्ञान मळार चंद्रयान, आदित्ययान विश्वविक्रम करता. अश्या फाटभूंयेर पुराय जगाचे कल्याण जावं म्हूण मागूया.
कोंकणी म्हापुरूसाक
पयलें नमन!
संवसाराचे घुडयेक
पयलें नमन!
———
सोमदत्त वि. सांगांवकार
जी. के. नायक क्लासीस
प्रियोळ
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
