भांगरभूंय | प्रतिनिधी
पावसाचे दीस लागीं पाविल्ले म्हूण रामू नांवाचो एक शेतकार आपल्या घरार वयर चडून तें शिंवतालो. तितल्यान एक मनीस थंय आयलो, शेतकारांचे लक्ष ताचे कडेन नासलेच. तर, तो मनीस ताका उलो मारून म्हणपाक लागलो,‘ओ… काका मात्सो सकयल देव. म्हाका तुका कितें तरी सांगपाक जाय.’ रामू शेतकार सकयल देवलो आनी त्या मनशाक ताणें विचारलें, ‘सांग कितें काम आसा तुजें? बेगीन सांग हांव हातांतलें काम सोडून सकयल देंवलां. बेगीन सांग.’
तो मनीस म्हणपाक लागलो, ‘काका, हांव भिकारी. म्हाका खूब भूक लागल्या. थोडें जेवण दी.’ तितल्यान शेतकारान म्हळें, ‘यो म्हज्या वांगडां.’ तितल्यान तो भिकारी आपल्याक कितें खावपाक गावतलें हे आशेन शेतकारा बरोबर ताच्या घराचेर चडलो आनी ताच्या वांगडा घर शिंवपाक लागलो. सगलें घर शिंवून जातकच शेतकारान ताका म्हळें की ‘आतां तूं चल. म्हजो जितलो वेळ हांवें तुजे वांगडा उलोवपाक घालो, तितलो वेळ तुवें म्हजें काम केलें.’ तितल्यान तो मनीस ताका परतून जेवणाचें विचारपाक लागलो. रामू शेतकारान सांगलें, ‘आयज म्हजे कडेन कांयच जेवण ना. हांव तुका कांयच मदत करपाक शकना. हें आयकून भिकारी तिडकीन म्हणपाक लागलो, ‘तुका हेंच सांगचें आसलें जाल्यार म्हाका सकयलूच सांगपाक जाय आसलें. आतां वयर आनीक आपोवन कित्याक सांगलें?
शेतकार म्हणपाक लागलो की जेवणूच मागपाक जाय आशिल्लें जाल्यार म्हाका सकयल कित्याक आपयलो. तुवेंनुय म्हाका हांव वयर आसलों तेन्नाच सांगपाक जाय आशिल्लें. तूं जसो म्हजे कडेन वागलो, तसोच हांव तुजे कडेन वागलों. दुसऱ्याच्या वेळाचें आनी कामाचें म्हत्व तुका कळपाक जाय, हें लक्षांत घे. फुडले फावट अशें करुं नाका, अशें म्हणून ताणें ताका जेवण दिलें.
तात्पर्य: आमकां दुसऱ्यांच्या कामाचें आनी वेळाचें म्हत्व कळपाक जाय.
स्नेहल कारबोटकार
9373379263
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
