भांगरभूंय | प्रतिनिधी
इंडीयन प्रिमीयर लिगेंत (आयपीएल) आयज दुसरी मॅच येजमान लखनौ सुपर जायण्ट्स आनी राजस्थान रॉयल्स ह्या पंगडां मदीं हांगाच्या अटल बिहारी वाजपय स्टेडियमाचेर जातली.
राजस्थान रॉयल्सान सात मॅची जिखून गुणतकट्यांत पयले सुवातेर आसा. दुसरे वटेन लखनौ सुपर जायण्ट्स पांच मॅची जिखून चवथे सुवातेर आसा. दोनूय पंगडां मदीं अजून मेरेन चार मॅची जाल्यात आनी तातूंतल्यो तीन मॅची राजस्थानान जिखल्यात.
अंदूंच्या हंगामांत राजस्थानान घरच्या मैदानाचेर खेळटना चार मॅची जिखल्यात, जाल्यार लखनौन घरच्या मैदानांत खेळटाना चारांतल्या तीन मॅचींनी जैत जोडलां. राजस्थान आयज प्रतिस्पर्धी पंगडांच्या मैदानाचेर लेगीत बरें प्रदर्शन करपाक इत्सूक आसतलो. जाल्यार दुसरे वटेन लखनौ घरच्या मैदानाचेर आनीक एक जैत जोडपाक सज्ज आसा.
लखनौची खेळपट्टी स्पिनरांक मजत करता आनी दोनूय पंगडां कडेन बरे स्पिनर आसात. ताका लागून एक उमळशीक वाडोवपी मॅच जावपाची शक्यताय आसा.
कांय दिसांनी संवसारीक टी-20 सर्ती खातीर भारताच्या पंगडाची निवड जावपाची आसा. हे फाटभुंयेर रवी बिश्नोई आनी युजवेंद्र चहल हांचे खातीर दरेक मॅच म्हत्वाची आसा. लखनौंत 44 टक्के बॉलींग ही स्पिनरांनी केल्या. 2022त लखनौंत स्पिनपांची इकॉनोमी 6.99 इतकी आशिल्ली. ही आयपीएलातल्या खंयच्याय मैदाना वयली सगल्यांत उणी आसा. चहलान अंदूं आठ मॅचींनी खेळटना 13 विकेटी घेतल्यात आनी सगल्यांत चड विकेटी घेवपाचे वळेरेंत तो जोड रितीन पयले सुवातेर आसा. बिश्नोईक अंदूंचो हंगाम म्हणपा सारको अजून बरो वचूंक ना. आठ मॅचींनी खेळटना ताका फकत पांचूच विकेटी फावो जाल्यात.
क्विंटन डी कॉक आनी जोस बटलर हे बॅट्समन खंयच्याय खिणाक मॅच घुंवडावपाक शकतात. ताका लागून तांकां आडावपाचो दोनूय पंगडांचो यत्न आसतलो. बटलराक आडावपाक जाय जाल्यार लखनौच्या पंगड वेवस्थापनाक मार्कस स्टॉयनीसाचो विचार करचो पडटलो. ताणें तीन खेपे बटलराक बाद केला. तशेंच ताच्या आड बटलराची स्ट्रायक रेट 130 परस उणी आसा.
डि कॉकाक आडावपाक राजस्थाना कडेन तीन पर्याय आसात. ताका आडावपा खातीर चहल सगल्यांत बरो पर्याय थारुये. चहलान डी कॉका आड णव मॅचींनी खेळटना स खेपे बाद केला. आर आश्विनान लेगीत चार खेपे डी कॉकाक तंबूंत धाडला, जाल्यार ट्रॅण्ट बोल्टान तीन खेपे डी कॉकाक बाद केला.
संदीप शर्मान कारकिर्दींतल्यो चडश्यो ओव्हरी ह्यो पावर प्लेंत घाल्यात. फाटल्या कांय काळा सावन डॅथ ओव्हरींनी लेगीत बरी बॉलींग घालता. लखनौक ताच्या आड सादूर रावपाची गरज आसा. लोकेश राहुल, डी कॉक आनी निकोलस पुरन हांच्या आड ताणें सदांच बरें प्रदर्शन केलां. संदीपान राहुलाक एकदा, डी कॉकाक दोन खेपे आनी पुरनाक एकदा बाद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
