भांगरभूंय | प्रतिनिधी
अंदूंची इंडीयन प्रिमीयर लीग (आयपीएल) ही बॅट्समनांनी गाजयली. अंदूंच्या हंगामांत अजून मेरेन सगल्यांत चड चार खेपे 250 परस धांवड्यो केल्यात. हांगाच्या ईडन गार्डन्साचेर येजमान कोलकाता नायट रायडर्सान 261 धांवड्यो केल्यो. ते उपरांत पंजाब किंग्साच्या हातांतल्यान ही मॅच गेली अशें दिसतालें. पूण, दोन मॅची बाकाचेर बसल्या उपरांत पुनरागमन करपी जॉनी बॅयरस्टोन वादळी शेंकडो नोंदयलो आनी पंजाबाक 8 विकेटींनी सोंपें जैत मेळोवन दिलें. पंजाबान 18.4 ओव्हरींनी फकत 2 विकेटी व्हगडावन 262 धांवड्यो करून जैत जोडलें.
प्रभसिमरन सिंग आनी जॉनी बॅयरस्टोन हांणी पंजाबाक आक्रमक सुरवात करून दिली. दोगांयनी पयले विकेटी खातीर 6 ओव्हरींनी 93 धांवड्यो केल्यो. प्रभसिमरनान 20 बॉलांनी चार चवके आनी पांच सक्यांचे मजतीन 54 धांवड्यो करून धांवबाद जालो. ते उपरांत बॅयरस्टोन रायली रुसो (26) हाच्या वांगडा मेळून पंजाबाचो स्कोर 10 ओव्हरींनी 1 विकेट व्हगडावन 132 मेरेन पावयलो.
बॅयरस्टो आनी रुसो हांणी 39 बॉलांनी 85 धांवड्यांची भागिदारी केली.
पंजाबान 15 ओव्हरींनी 2 विकेटी व्हगडावन 201 धांवड्यो केल्यो आनी अखेरच्या 30 बॉलांनी 61 धांवड्यांची गरज आशिल्ली.
मजगतीं, बॅयरस्टोन 45 बॉलांनी आयपीएलांतलो दुसरो शेंकडो पुर्ण केलो. ताणें आठ चवके आनी आठ सके मारले. शशांक सिंगान फॉर्म कायम राखतना बॅयरस्टो वांगडा 27 बॉलांनी 50 धांवड्यो पुर्ण केल्यो. अशे तरेन पंजाबाक निमाण्या 18 बॉलांनी 34 धांवड्यो जाय आशिल्ल्यो.
शशांकान दोन सके मारून 23 बॉलांनी अर्द शेंकडो पुर्ण केलो. हर्षित राणान घाल्ले 18वे ओव्हरींत 25 धांवड्यो आयल्यो. बॅयरस्टोन 48 बॉलांनी आठ चवके आनी णव सक्यां सयत नाबाद 108 धांवड्यो केल्यो. शशांकान 28 बॉलांनी दोन चवके आनी आठ सक्यां सयत नाबाद 68 धांवड्यो केल्यो.
ते आदीं सुनील नरेन आनी फिल सॉल्ट ह्या दोगांयनी धांवड्यांचो पावस घालो आनी कोलकाता नायट रायडर्स बरी बुन्याद घालून दिली. ते उपरांतच्या बॅट्समनांनी हाचो फायदो घेत धांवड्यांचो दोंगर उबारलो. पंजाब किंग्साच्या बॉलरांची अवस्था सामकी बाबत जाली. कोलकातान ईडन गार्डन्सांत टी-20 क्रिकेटींतली सर्वोच्च धांवसंख्या नोंदयली.
सुनील आनी सॉल्ट हांणी पयल्या 10 ओव्हरींनी 137 धांवड्यो केल्यो आनी कोलकाताची आयपीएलाच्या इतिहासांत पयल्या 10 ओव्हरींतली सर्वोच्च कामगिरी थारली.
पंजाब किंग्सान टॉस जिखून पयलीं बॉलींग करपाचो निर्णय घेतलो त्या वेळार चडश्या जाणकारांनी अजाब उक्तायलें. सुनील आनी सॉल्ट हांणी वळेरेन 24 आनी 25 बॉलांनी वैयक्तीक अर्द शेंकडे पुर्ण केले. मजगतीं, पंजाबाच्या फिल्डरांनी तीन कॅची सोडल्यो. सुनील नरेन अखेरेक 32 बॉलांनी 9 चवके आनी चार सक्यांचे मजतीन 71 धांवड्यो केल्यो. सॉल्टान 37 बॉलांनी स चवके आनी स सक्यांचे मजतीन 75 धांवड्यो केल्यो.
ईडन गार्डन्साचेर सर्वोच्च 138 धांवड्यांचे भागिदारीचो विक्रम सुनील आनी सॉल्ट हाणें नोंदयलो. तांणी युसुफ पठाण आनी शाकिब अल हसन हांचो विक्रम मोडलो. दोगांयनी 2016त गुजरात लायन्सा आड 134 धांवड्यो केल्ल्यो. सुनील आनी सॉल्ट हांणी धांवड्यो करपाची जी गती मेळोवन दिल्ली ती कायम राखपाचें काम वेंकटेश अय्यर आनी आंद्रे रसेल हांणी चालू दवरलें. पूण, अर्शदीप सिंगाच्या बावन्सर रसेलान (24) चूक केली आनी तो बाद जालो. तो बाद जालो त्या वेळार कोलकातान 15.3 ओव्हरींनी 3 बाद 203 धांवड्यो केल्ल्यो. वेंकटेश आनी श्रेयस अय्यर हांची आक्रमक बॅटींग पळोवन प्रेक्षक खुशालभरीत जाले.
अय्यरान 10 बॉलांनी एक चवको आनी तीन सक्यांचे मजतीन 28 धांवड्यो केल्यो. वेंकटेशान रसेल आनी अय्यर हांच्या वांगडा दरेकी 18 बॉलांनी वळेरेन 40 आनी 43 धांवड्यांची भागिदारी केली. रिंकू सिंग पांच धांवड्यांचेर कॅच बाद जालो. वेंकटेशान 22 बॉलांनी नाबाद 39 धांवड्यो केल्यो आनी कोलकातान निर्धारीत 20 ओव्हरींनी 6 बाद 261 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
