भांगरभूंय | प्रतिनिधी
पर्यावरणीय प्रभाव मुल्यांकन प्राधिकरणाचे स्थापनेक लागून मार्ग मेकळो
भांगरभूंय । प्रतिनिधी
पणजीः गोंयांतल्या पर्यावरणा कडेन संबंदीत प्रकल्प आनी हेर गजालींक परवानगी दिवपा खातीर गरजेचो आशिल्ल्या पर्यावरणीय प्रभाव मुल्यांकन प्राधिकरणाची अखेर केंद्र सरकारान स्थापना केल्या. प्राधिकरणाक लागून गोंयांतलो म्हत्वाचो कायदेशीर रेंव काडपाचो प्रस्न सुटावो जातलो. पूण कायदेशीर रेंव काडप पावसाळ्या उपरांतूच सुरू जावपाची शक्यताय आसा.
पर्यावरणीय प्रभाव मुल्यांकन प्राधिकरणाची मुजत पांच म्हयन्यां आदीं 24 नोव्हेंबर 2023 ह्या दिसा सोंपिल्ली. ते उपरांत गोंय सरकारान नवें प्राधिकरण स्थापन करपा संबंदांतली फायल आनी नांवां पर्यावरण मंत्रालया कडेन धाडिल्लीं. पूण मंत्रालयान कांय उणाव काडिल्ल्यान प्राधिकरणाची स्थापना जावपाक कळाव जाल्लो. अखेर केंद्रान डॉ. पुरुषोत्तम पेडणेंकार हांचे अध्यक्षते खाला तीन वांगड्यांचें प्राधिकरण स्थापन केलां, अशी अधिसुचोवणी जारी केल्या. हे समितीचो कार्यकाळ तीन वर्सांचो आसतलो. तशेंच प्राधिकरणाक मजत करचे खातीर 9 वांगड्यांचे तज्ञ समितीची स्थापना लेगीत केल्या.
निर्णय घेवपाक 45 दिसांची मुजत
गोंयांत फाटल्या कांय वर्सां सावन कायदेशीर रेंव काडपाचो विशय गाजता. मांडवी, जुवारी आनी शापोरा ह्या तीन न्हंयांतल्यान कायदेशीर रेंव काडपाची प्रक्रिया खण खात्यान पुराय केल्या. पूण कायदेसीर रेंव काडपा खातीर गरजेचे पर्यावरणीय दाखले दिवपी पर्यावरणीय प्रभाव मुल्यांकन प्राधिकरणूच अस्तित्वांत नाशिल्लें. ताका लागून हो विशय हुमकळिल्लो. खण खात्याचो अर्ज मेळ्ळे उपरांत प्राधिकरणाक संबंदीत विशयांचेर 45 दिसां भितर निर्णय घेवचो पडटा. ताका लागून फुडल्या देड म्हयन्यात निर्णय घेवन कायदेशीर रेंव काडपाक मंजुरी दिवपाक शकता. पूण ते उपरांत रोखडीच पावसाक सुरवात जातली. ताका लागून कायदेशीर तरेन रेंव काडपाक पावसाळ्या उपरांतूच सुरवात जावपाची शक्यताय आसा.
प्राधिकरणाचे वांगडी
डॉ. पुरुषोत्तम पेडणेंकार (अध्यक्ष), डॉ. दीपक गायतोंडे (वांगडी), पर्यावरण खात्याचे संचालक ((वांगडी सचीव), तज्ञ मुल्यांकन समिती- पाश्कोल नोरोन्हा (अध्यक्ष), डॉ. नितीन सावंत (वांगडी), डॉ. सुभाष भोसले (वांगडी), प्रसाद रांगणेकार (वांगडी), डॉ. जुझे फालेरो (वांगडी), संजय जहागिरदार (वांगडी), सुजितकुमार डोंगरे (वांगडी), संजय आमोणकार (वांगडी), प्रदुशण नियंत्रण मंडळाचे अभियंते (वांगडी सचिवपदार).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
