भांगरभूंय | प्रतिनिधी
‘पाद्री’ हें उतर कानार पडटनाच खंय काळजांत देवाचें आसणें जाग घेवंक लागता. न्हिदसुरें देवपण जागृत जाता. भावार्थ्यांक अशें भोगप सैमीक आसता. हाचें कारण म्हणल्यार कातोल्क धर्मांत ‘पाद्री’ जावन आसा मुखेल फुडारी. धर्माच्यो चालीरिती पवित्र सभेच्या कायद्या प्रमाणें फुडें व्हरुंक.
2017 वर्सा पाद्री विताल मिरांद वडिलाच्या हुकूमान आमच्या म्हळ्यार सावर्डे- कुडचडेच्या फिर्गजेंत पाद्र विगार म्हण आयलो. आपलो सात वर्साचो कार्यकाळ ताणें उमेदीन सुरु केलो. तातूंतल्यानूच दैवीक मोग शिंपडावंक लागलो. आतां ताचो कार्यकाळ शेवटाच्या दिसांनी पाविल्लो आसा. जी उमेद ताणें सुरवातेक दाखयल्ली तीच उमेद ताणें शेवटाच्या दिसां मेरेन सांबाळून दवरिल्ली आसा.
पाद्र विताल मिरांदाक देवान खूब ब-या देण्यांनी भरला. ह्या गुणांतलो एक वर्तो गूण म्हळ्यार ताका प्रवचनांतल्यान देवाच्या उतरांची मांडणी करपाची उत्तम कपशी (कळाशी) आसा. ताची प्रवचनां लोकांक आवडटात. आनी लोकांनी तें समजून घेवन ताचो जिवितांत उपेग करचो म्हण तो वेग-वेगळ्यो तरां उजार करता. जशे चडशे पाद्री आपलीं प्रवचनां कसलीं तरी उदारणां घेवन सुरु करतात. तसो तोवूय आपल्या आदाराक एक उदारण घेता. तें लोकांच्या काळजां मनांत रिगून उरता. तशें करुन तो त्या उदारणाक लागू जातल्यो वस्तू वेदीचेर हाडटा. उपरांत प्रवचनां चालू करता. ती –
ती वस्ती दाखोवन आपूण कितें सांगूंक सोदता. तें समेस्तांक पटोवन दिता. असल्या प्रचनांतल्यान लोकांक एके वटेन उमेदीर दवरता. जाल्यार दुसरे वटेन भावार्थ्यांच्या काळजांत खोल रिगून उरता तशें करता.
पाद्री विताल मिरांदान पादविगाराचीं सुत्रां हातांत घेतल्या उपरांत आमच्या फिर्गजेंत पुस्कळ म्हत्वाचो वावर हाताळ्ळा. जावं मागीर तो अत्मीक वटेन जावं फिर्गजेचीं भाटां-बेसां, इमारतीं, कोर्टांत चालू आशिल्ल्या खटल्या वटेन, इगर्जेची बांदावळ सुगूर उरची म्हण ताणें चोवशिल्ल्यान तिचो वावर केला. शिमतेरीचो भायलो वाठार नवे मांडावळीर घाला. तिचो रस्तो रुंदावन शिमतेरीत भायर लोकांक चलून वचपाचे अडचणीक सुमाराची थाकाय हाडल्या, शिमतेरी भायर जेझुचो पुतळो उबारुन शिमतेरीक नवें रुप दिलां. असो पुस्कळ वावर ताणें सावर्डेचे पवित्र सभेंत केला.
पाद्री वितालाक आपली मांयभास कोंकणीची खूब अपुरबाय आनी हुस्को. कोंकणी गोंयकाराचे मुठींत आसली ती आतां हाताच्या उकत्या ताळटार पावल्या. आनी खंयच्याय वेळार कापसा परीं वा-यार उबून नाच्च जायत, हाचो हुस्क ताका आसा. कोंकणी विशीं कसलोय सुवाळो, तियात्र, चलचित्र, संस्कृतीक कार्यावळ, कोंकणी पुस्तकाची विक्री आसा. आनी तांची इगर्जेंत कळोवणी करुंक जाय जाल्यार तो केन्नाच ना म्हणना.
मायाच्या शेवटाक पार्दी विताल आपल्या वडिलांचे आर्दी प्रमाण फुडले वाटेचीं पावलां उबारतलो. तेन्ना ताका सगळें येस आंवडेतां.
(लिप्यांतर : विशाल सिनाय खांडेपारकार, 8080622370)
अँथनी मिनेझिस
9822980231
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
