भांगरभूंय | प्रतिनिधी
-1999 तले वेंचणुकेंत श्रीपाद नायक हांणी खलप हांकां हारयिल्ले
पणजी: केंद्रीय मंत्री श्रीपाद नायक आनी आदले केंद्रीय मंत्री अॅड. रमाकांत खलप वट्ट 25 वर्सां उपरांत लोकसभा वेंचणुकेच्या रिंगणांत एकामेका मुखार आयल्यात. श्रीपाद नायक हांणी 1999 तली लोकसभा वेंचणूक काँग्रेसी वतीन रिंगणांत अाशिल्ल्या रमाकांत खलप हांचें आड जिखिल्ली. ते उपरांत काँग्रेसीन खलप हांकां परतून उमेदवारी दिवंक नाशिल्ली. पूण हे खेपे तांचेर पक्षान विस्वास दवरला.
भाजपान 1996 चे लोकसभा वेंचणुकेंत उत्तर गोंयांतल्यान आदले मुख्यमंत्री मनोहर पर्रीकार हांकां उमेदवारी दिल्ली. त्या वेळार काँग्रेस वतीन अमृत कासार आनी मगोच्या उमेदवारीचेर रमाकांत खलप वेंचणूक लडयताले. हे वेंचणुकेंत खलप हांकां 92,348 मतां मेळिल्लीं, जाल्यार अमृत कासार हांकां 81,803 आनी मनोहर पर्रीकार हांकां 36,022 मतां मेळिल्ली. ही वेंचणूक जिखून खलप लोकसभेंत पावले आनी केंद्रीय कायदो मंत्रीपद तांकां मेळिल्लें. ते उपरांत राज्यांत जायत्यो राजकी घडामोडी घडून खलप हांणी काँग्रेसींत प्रवेश केलो. उपरांत 1999 च्या वेंचणुकेंत काँग्रेसची उमेदवारीय तांणी मेळयली. त्या वेळार पयलेच खेपे भाजपा वतीन लोकसभेच्या रिंगणांत देंविल्ल्या श्रीपाद नायक हांचे आड तांची लडत जाली. हे वेंचणुकेंत श्रीपाद नायक हांकां 1,04,958 मतां मेळिल्लीं. जाल्यार खलप हांकां 68,237 मतां मेळिल्ली. तांकां वट्ट 36,721 मतांनी हार घेवची पडिल्ली. ते उपरांत खलप हांकां काँग्रेसीन केन्नाच उमेदवारी दिवंक नाशिल्ली.
1999 पसून आतां मेरेन जाल्ल्या सेगीत पांच लोकसभा वेंचणुकांनी श्रीपाद नायक हांणी उत्तर गोंयचो गड स्वताच्या ताब्यांत दवरपांत येस मेळयलें. ह्या काळांत फक्त 2009 तले एकाच वेंचणुकेंत विरोधकांनी तांचे आड खर लडत दिली. हे वेंचणुकेंत उत्तर गोंयांतल्यान ते फक्त 6,353 मतांनी जैतिवंत जाल्ले. काँग्रेस उमेदवार जितेंद्र देशप्रभू हांणी तांचे आड खर लडत दिल्ली. 2004 त काँग्रेसच्या विल्फ्रेड डिसोझा हांची 56,213 मतांनी, 2014 त रवी नायक हांची सुमार 1.05 लाखांच्या मतांच्या फरकान जाल्यार फाटले वेंचणुकेंत गिरीश चोडणकार हांकां 80,247 मतांनी हारोवन श्रीपाद नायक हांणी जैताचो रथ कायम दवरलो. ह्या काळांत केंद्रीय मंत्री म्हूण जायत्या खात्यांची जापसालदारकी तांणी येसस्वीरितीन सांबाळ्ळी.
उत्तरेंतली लडत अटीतटीची जावपाची शक्यताय
– फाटल्या 25 वर्सांत जाल्ल्या लोकसभा वेंचणुकांतले निकाल पळयल्यार उत्तर गोंयांतली लडत फक्त भाजप आनी काँग्रेस ह्या दोन पक्षां मदींच जाल्ली दिसता.
-अंदूचे वेंचणुकेंत मात भाजप, काँग्रेस आनी रिव्हॉल्यूशनरी गोवन्स (आरजी) अशें तीन पक्ष देंविल्ले आसून, तिनूय पक्षांनी तुल्यबळ उमेदवार दिल्यात.
-आरजीन संस्थापक मनोज परब हांकांच मैदानांत देंवयल्या. भाजपा वतीन परतून श्रीपाद नायक आनी काँग्रेस कडल्यान 25 वर्सां उपरांत अॅड. रमाकांत खलप वेंचणूक लडयतात. फाटले विधानसभा वेंचणुकेंत आरजीन आपलो करिश्मा दाखयला. ताका लागून हे खेपे उत्तर गोंयांतली लडत अटीतटीची जावपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
