भांगरभूंय | प्रतिनिधी
शैलेश झिंगडेः रक्कम बापायच्या खात्यांत जातली जमा
पणजी : रेनकोट आनी युनिफॉर्मा बदला विद्यार्थ्यांक रोख रक्कम दिवपाचो निर्णय सरकारान घेतला. हाका लागून अंदूं रेनकोट आनी युनिफॉर्मा बदला विद्यार्थ्यांक 1100 रुपया मेळटले. दोन सप्तकां भितर पयशे पालकांच्या खात्यांत जमा जातले.
शिक्षण संचालक शैलेश झिंगडे हांणी ही म्हायती दिली. सरकारी शाळांनी पयली आनी तिसरीच्या विद्यार्थ्यांक रेनकोट आनी युनिफॉर्म दिवपाची येवजण आसा. शिक्षणीक वर्स सुरू जावन 6 म्हयन्या मेरेन युनिफॉर्म न मेळपाच्यो घडणुको घडल्यात. तशेंच पावस सोंपलो तरी विद्यार्थ्यां मेरेन रेनकोट न पावपाचे प्रकार घडल्यात. हाचेर उपाय म्हूण रेनकोट तशेंच युनिफॉर्मा बदला रोख रक्कम दिवपाचो निर्णय शिक्षण खात्यान फाटल्या वर्सा घेतिल्लो. शिक्षणीक वर्स सुरू जाले काय पयली आनी तिसरीच्या विद्यार्थ्यंच्या बापायच्या खात्यांत रोख रक्कम जमा करपाचो निर्णय सरकारान घेतला. हे प्रमाण अंदूं सावन रेनकोट आनी युनिफॉर्माचे पयशे खात्यांत जमा जातले.
शिक्षणीक वर्स आयज सावन सुरू जाता. पयलीच्या विद्यार्थ्यांची म्हायती घेवन बापायच्या बँक खात्याचो नंबर शाळांक घेवचो पडटलो. पयली सयत तिसरेच्या विद्यार्थ्यांच्या बापायच्या खात्याचो नंबर घेवपाचो वावर सरकारी मुळाव्या शाळांक करचो पडटलो. हाका थोडो वेळ लागतलो. दोन सप्तकां उपरांत रेनकोट आनी युनिफॉर्माचे पयशे खात्यांनी जमा जातले अशी म्हायती शिक्षण संचालक शैलेश झिंगडे हांणी दिली.
उशीर जाता म्हूण निविदा
काडपाचो निर्णय रद्द
रेनकोट आनी युनिफॉर्मा बदला पयशे दिवपाचो निर्णय फाटल्या वर्सा शिक्षण खात्यान घेतिल्लो. रेनकोट ठोक पद्दतीन खरेदी करून विद्यार्थ्यांक दिले जाल्यार ते सवाय पडटात म्हूण निविदा जारी करपाची फायल तयार जाल्ली. निविदा जारी जाले उपरांत रेनकोट उपलब्ध जावपाक एक म्हयनो लागतलो अशें कंत्राटदारांनी सांगलें. रेनकोटाक एक म्हयनो उशीर जावप परवडपा सारकें ना. म्हूण निविदा जारी करपाचो निर्णय रद्द जालो. फुडल्या वर्सा पयशे जमा करपा बदला रेनकोट दिवपाचो विचार परतून जावपाची शक्यताय आसा.
रेनकोटाचे 500 रुपया आनी युनिफॉर्माचे 600 रुपया अशे 1100 रुपया खात्यांत जमा करपाचो निर्णय जाला. निविदा जारी करून रेनकोट दिले जाल्यार सरकाराक रेनकोट 300 रुपया पडटा, अशी म्हायती शिक्षण खात्यांतल्या गोपां कडल्यान मेळ्ळी.
रेनकोट वा युनिफॉर्म दोन वर्सां वापरप शक्य आसता. हाका लागून पयली आनी तिसरीच्या विद्यार्थ्याक रेनकोट तशेच युनिफॉर्म दिवपाची येवजण आसा. सरकारी शाळांनी गरीब विद्यार्थी वतात. हे खातीर ही येवजण फक्त सरकारी शाळांतल्या विद्यार्थ्यां खातीर आसा. सरकारी शाळांनी भुरग्यांक घालपाक पालकांक उर्बा मेळची हो उद्देश ही येवजण सुरू करपा फाटल्यान आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
