भांगरभूंय | प्रतिनिधी
पालिका संचालकांचाे आदेश जारी
भांगरभूंय । प्रतिनिधी
म्हापशेंः म्हापशें नगरपालिका प्रभाग 7 चे नगरसेवक अॅड. तारक आरोलकार हांकां नगरसेवक पदा वयल्यान अपात्र थारायल्यात. हे विशींचो आदेश नगरपालिका खात्याचे संचालक गुरूदास पिळर्णकार हांणी जारी केला. तशेंच नगरपालिका कायदो कलम 50 खाला ह्या प्रभागाची रितीं सुवात भरपाची सुचोवणी पत्रा वरवीं राज्य वेंचणूक आयोगाक केल्या.
हालींच समाज कल्याण खात्याच्या प्रमाणपत्र छाननी समितीन आरोलकार हांचो ओबीसी दाखलो बेकायदो थारायिल्लो. ते उपरांत बार्देस उपजिल्होधिकाऱ्यांनी हो दाखलो फाटीं घेवन रद्द थारायिल्लो. 18 मार्च 2021 दिसा उपजिल्होधिकाऱ्यांनी हो दाखलो दिल्लाे. ह्या दाखल्याच्या आदारान तारक आरोलकार हे ओबीसी राखीव आशिल्ल्या म्हापशें पालिका प्रभाग 7तल्यान नगरसेवक म्हूण वेंचून आयिल्ले.
ह्या दाखल्याच्या विरोधांत आदले नगरसेवक फ्रांसिस्को (फ्रेन्की) कार्व्हालो हांणी कागाळ केल्ली. आरोलकार हांणी बार्देस उपजिल्होधिकारी कार्यालयांत बनावट कागदपत्रां सादर करून ओबीसी दाखलो मेळयिल्ल्याचो दावो कार्व्हालो हांणी केल्लो. फटीचीं आनी बनावट कागदपत्रां तयार करून फटवणूक करप हो गंभीर गुन्यांव आसा, म्हूण हे ओबीसी प्रमाणपत्र रद्द करपाची मागणी कार्व्हालो हांणी केल्ली.
आतां नगरपालिका कायदो 1968 च्या कलम 49 प्रमाण नगरसेवक म्हूण आरोलकार हांकां मेळिल्ल्यो सगल्यो सवलती फाटीं घेतिल्ल्याचे ह्या अपात्र आदेशांत पालिका संचालकांनी नमूद केला.
मजगतीं, ओबीसी दाखल्या विशीं उपजिल्होधिकारी आनी प्रमाणपत्र छाननी समितीच्या निर्णया आड तारक आरोलकार हांणी मुंबय उच्च न्यायालयाच्या गोंय खंडपिठांत आव्हान दिल्लें. ह्या खटल्याची सुनावणी खंडपिठांत सध्या प्रलंबीत आसा.
म्हजो न्यायालयाचेर पुराय विश्वास आसा. म्हजे कडल्यान कितेच गैर घडूंक ना. म्हाका निश्चीत न्याय मेळटलो, असो विस्वास अॅड. तारक अारोलकार हांणी उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
