भांगरभूंय | प्रतिनिधी
गोंय हें पर्यटन राज्य. हांगा सगल्या प्रवृत्तीचे लोक येतात, वतात. मुखामळ पळोवन ते सभ्य मनीस काय गुन्यांवकार तें तशें वळखुपाक येना. पूण, पर्यटनाच्या नांवान हांगां उंवाळून उडयिल्ले लोक येतात ही गजाल सत. कांय जाण चोरयो करपाक तर थोडे घुंवळे वखदां विकपाक. तांचे कडेन म्हाल सांपडटा, पूण तो चड नासता. केन्नाय शिमेर सोरो जप्त जाता. पयशे चुकूनच सांपडटात. मात, लोकसभा वेंचणुकेची आचारसंहिता लागिल्ल्याक, म्हणल्यार 16 मार्च ते 22 एप्रील ह्या 37 दिसांनी 16 कोटी 65 लाख 53 हजार 572 रुपयांचो म्हाल जप्त केला. अजून 14 दीस आसात. म्हणटकच हो आंकडो वाडपाचो आसा. रेल्वे पुलीस, एनसीबी, शीम शुल्क, अबकारी, पुलीस, आयकर आनी वेवसायीक कर ह्या विभागांनी मेळून ही कामगिरी केल्या. साडेपांच कोटी रोख रक्कम सांपडल्या. तर अबकारी खात्यान 3,43 कोटींचो 62 हजार 949 लिटर सोरो जप्त केला. हाचे भायर पुलिसांनी 74 लाखांचो, रेल्वे पुलिसांनी 70 हजारांचो सोरो धरला. मोबायल फोनूय जप्त केल्यात. कांय भेटवस्तूय आसात. तिनेक कोटींची घुंवळे वखदां सांपडल्यांत. हें सगलें वेंचणुकेक लागून लोकांक, वावुरप्यांक वांटपाक हाडटाले वा हेर राज्यांनी व्हरताले तें चवकशे उपरांत कळटलेंच. कांय वस्तू कायदेशीर पद्दतीनय व्हरताले जावये. पूण, इतलो म्हाल हेर दिसांनी जप्त जायना, हें मान्य करचेंच पडटलें. देशभरांत 1 मार्च ते 13 एप्रील ह्या काळांत वट्ट 4650 कोटींचो म्हाल जप्त केला. 2019 चे वेंचणुकेंतले जप्ती परस ही चड आसा. 2019 त 1175 कोटी रुपयांचो म्हाल जप्त केल्लो. हाचे वयल्यान आमी उदरगतीच्या मार्गाचेर चलतात, अशेंच म्हणचें पडटलें. सादारण 3500 कोटी वाड जाली ही. जप्त केल्ले भांगरा सारके मोलादीक धातू 3.35 कोटींचे, फुकट वांटपाच्यो वस्तू 1 कोटी 40 लाख 70 हजारांच्यो. हें खास वेंचणुके खातीर न्हय मूं?
पुलीस आनी हेर सरकारी यंत्रणां हेर दिसांनीय वावुरतात. चेक नाके, दर्यावेळो, भौशीक जागे, येरादारीचीं साधनां… सगले कडेन तांचें बारीक लक्ष आसता. मात, त्या काळांत इतलो मोलाचो आनी असो फटाफट म्हाल धरप जायना. खास वेंचणुकांच्या दिसांनी मतदारांक, वावुरप्यांक खोशी दवरपाक राजकी पक्ष सक्रीय जाल्यात काय सुरक्षा, तपासणी यंत्रणां अदीक जागृत, सतर्क जाल्यात? जर जप्त केल्ल्या कांय म्हालाचो वेंचणुके कडेन संबंद नाशिल्लो, जाल्यार तो हेर दिसांनीय यो-वच करता आसतलो. मागीर तेन्ना तो इतल्या प्रमाणांत कित्याक सांपडना काय? यंत्रणांनी सदांच अशीच जागृकताय दाखयली, जाल्यार गुन्यांवकारांक बेकायदेशीर काम करपाचें धाडसूच जावचें ना. गोंयचेर बेकायदेशीर गजालींचें नंदनवन अशी म्होर बसल्या तीय पुसतली…. आनी ती पुसून वचप सामकें गरजेचें. कारण वयर म्हणलां ते प्रमाण, आमचें गोंय पर्यटन राज्य. तेंय संवसारांतलें नांवाजतें. हांगा दरवर्सा लाखांनी देशी, विदेशी पर्यटक येतात. गुन्यांव वाडत गेले जाल्यार तांचो आंकडो देंवतलो आनी आपशीच ताचो धपको पर्यटन वेवसायाक बसतलो. ते खातीर आमच्या सरकारी यंत्रणांनी वर्साचे बाराय म्हयने चड सादूर रावंक फाव.
मुख्य वेंचणूक आयुक्त राजीव कुमार हांणी हे वेंचणुकेंत चार ‘एम’ आव्हान थारतले, अशें म्हणिल्लें. तातूंत मनी (पयसो), मसल (ताकद), मीस इन्फॉर्मेशन (चुकीची म्हायती) आनी एमसीसी व्हायोलेशन (आचारसंहितेचो भंग) हांचो आस्पाव आसा, अशेंय तांणी सांगिल्लें. तें सत्य हें आचारसंहिते उपरांतच्या म्हयन्या भरांत स्पश्ट जालां. प्रचारा वेळार हेर गैरप्रकारूय जातात, तांचेरूय थळाव्या वेंचणूक अधिकाऱ्यांक लक्ष दवरचें पडटलें. मे म्हयन्याचें पयलें सप्तक चड संवेदनशील आसतलें. खरें म्हणल्यार राजकी पक्षांनी आपल्या वावुरप्यांचेर नियंत्रण दवरपाक जाय. सोऱ्याचे न्हंयेंत बुचकळपी वावुरपी एके वटेन आसात, तशेंच प्रचारा मजगतीं, समाजांत तेढ निर्माण करपीय कांय दुश्ट मनोवृत्तीचे वावुरपी आसतले. तांचेर वेंचणूक आयोग आनी हेर सरकारी यंत्रणांचें लक्ष जाय. सोरो घातकूच, पूण हें ताचे परस चड भिरांकूळ. आमी भारतीय खूब संवेदनशील. ताका लागून भावनेच्या भरांत आमी रोखडोच दुसऱ्यांचेर विस्वास दवरतात आनी मागीर त्रासांत पडटात, दुसऱ्यांकूय त्रासांत घालतात. चुकीची म्हायती दिवपी, आचारसंहितेचो भंग करप्यांचेरूय चाबूक बसपाक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
