भांगरभूंय | प्रतिनिधी
फुडल्या 50 वर्सांचो विचार करून ‘मंत्रालय’ इमारतीचें नुतनीकरणः मुख्यमंत्री
भांगरभूंय I प्रतिनिधी
पणजी : प्रधानमंत्री नरेंद्र मोदी हांणी फुडल्या 100 वर्सांचो विचार करून दिल्लींत नवी संसद इमारत उबारल्या. तेच धर्तेचेर गोंय सरकारानूय फुडल्या 50 वर्सांचो विचार करून ‘मंत्रालया’च्या इमारतीचें नुतनीकरण केलां. ताचो फुडल्या काळांत मुख्यमंत्री, मंत्री जावप्यांक फायदो जातलो, अशें मुख्यमंत्री डॉ. प्रमोद सावंत हांणी मंगळारा सांगलें.
मंत्रालयाचें उक्तावण आनी नामकरण सुवाळ्या उपरांत ते पत्रकारां कडेन उलयताले. ह्या वेळार सगले मंत्री, भाजप आमदार, भाजपाचे राज्यातले फुडारी तशेंच प्रशासनांतले अधिकारी हाजीर आशिल्ले.
वैदीक मंत्रांचो जप आनी धर्मीक विधी वरवीं मुख्यमंत्र्यांचे हस्तुकीं मंत्रालयाचें उक्तावण आनी नामकरण जालें. हेर राज्यांनी मंत्र्यांचीं कार्यालयां आशिल्ल्या इमारतीक मंत्रालय म्हणटात. गोंयांत मात आतां मेरेन हे इमारतीक ‘मिनिस्टर ब्लॉक’ म्हणटाले. पूण आतां ही इमारत ‘मंत्रालय’ म्हूण वळखताले, अशें मुख्यमंत्री डॉ. सावंत हांणी म्हणलें.
मंत्रालयाच्या इमारतीचें नुतनीकरण करप गरजेचें आशिल्ले. आदले इमारतींत मंत्र्यांक कांय समस्यां जाणवताल्यो. ताका लागून सरकारान हे इमारतीच्या नुतनीकरणाचो निर्णय घेतलो. राज्य साधन-सुविधा विकास म्हामंडळा वरवीं सुमार 10 कोटी रुपया खर्चून इमारतीच्या नुतनीकरणाचें काम पुराय केलां. ताका लागून हाचे मुखार मंत्र्यांचीं कामां हेच इमारतींतल्यान सुरू जातलीं, अशेंय तांणी सांगलें.
सगल्याच आमदारांक निमंत्रण दिल्लें
मंत्रालयाच्या उक्तावण आनी नामकरण सुवाळ्याक विरोधी पक्षांचे आमदार हाजीर रावंक नात. हे विशीं पत्रकारांनी मुख्यमंत्र्यांक विचारले, तेन्ना चाळीसूय आमदारां सयत दरेक पक्षाच्या राज्य अध्यक्षांकूय हे कार्यावळीचें आमंत्रण दिल्लें. ही कार्यावळ खंयच्या एका पक्षाची न्हय, अशेंय तांणी नमूद केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
