भांगरभूंय | प्रतिनिधी
सुरत जिल्हो न्यायालयान मानहानी प्रकरणांत काँग्रेसीचे फुडारी राहुल गांधी हांकां दोन वर्सांचे बंदखणीची ख्यास्त दिली. रोखडोच जामीनूय दिलो. ही याचिका गुजरातांतले आमदार पूर्णेश मोदी हांणी घाल्ली. 2019 त कर्नाटकांतले एके रॅलींत राहुल हांणी भाशण करतना थोमणो मारिल्लो, ‘सगल्या चोरांचें नांव मोदीच कशें? ललीत मोदी, निरव मोदी….. सोदल्यार आनीकूय सांपडटले.’ ह्या भाशणा उपरांत पूर्णेश हांणी ‘आमच्या मोदी समाजाक चोर म्हणलें’ असो दावो करून ही याचिका दाखल केल्ली. काल न्यायालयांत निकाला वेळार राहुल गांधी हजर आशिल्ले. सत्ताधारी आनी विरोधकां मदीं हें चालूच आसता. तातूंत कितें व्हडलेशें, अशें कोणाकूय दिसूं येता. पूण कोर्टाचो निकाल तो निकाल. उच्च न्यायालय आनी मुखार सर्वोच्च न्यायालयांत तो कायम उरलो जाल्यार राहूल गांधी हांची खासदारकी वचूं येता. लोकप्रतिनिधी कायद्या प्रमाण, कसल्याय प्रकरणांत दोन वर्सां परस चड ख्यास्त जाल्यार आमदारकी, खासदारकी रद्द जाता. उपरांत स वर्सां वेंचणूक लढोवपाक मेळना. खुद्द सभाघर संबंदीत पक्षाच्या मागणे वयल्यान खास समिती स्थापन करूं शकता…. तिचो प्रस्ताव मानून घेवन दोशी लोकप्रतिनिधीची वांगडीपद रद्द करूं शकता. हाचे पयलीं तशें जालां. प्रस्न विचारपाक पयशे घेतले म्हूण 2005 त इकरा खासदारांचें वांगडीपद गेल्लें. पेजाद राजकारणी इंदिरा गांधी हांची 1978 त खासदारकी गेल्ली. तांकां बंदखणूय जाल्ली. ताचे पयलीं सुब्रमण्यम स्वामी हांचे बाबतींतूय तें जालां. पयलीं निकाला आड तीन म्हयन्यां भितर अपील करपाक मेळटालें. मात, 2013 सावन दोशी थारायलो काय लोकप्रतिनिधी खासदारकी तत्काळ रद्द जांव येता.
खासदार कायदे करतात. तांणीच ते मोडले जाल्यार चुकीचो संदेश वतलो. तेन्ना चडांत चड ख्यास्त दिवची, अशी मागणी फिर्यादी वकिलान केल्ली. तर राहुलान ‘आपूण भ्रश्टाचारा आड उलयलां, म्हज्या उलोवपांत कोणाचें लुकसाण जावंक ना’, अशें म्हणलां. भाजपा हो देशांतलोच न्हय, तर घडये संवसारांतलो सगल्यांत व्हडलें संघटन आशिल्लो पक्ष, हें मान्य करचेंच पडटलें. तांणी राहुल गांधी विरोधांत देशव्यापी आंदोलन करपाचो निर्णय घेतला. कांय कडेन तें सुरूय जालां. तेन्ना काँग्रेसीक कोर्टाचो हो निकाल म्हारग पडपाची शक्यताय न्हयकारपाक येना. काँग्रेसीनूय राहुल हांकां अटक जाल्यार जेल भरो आंदोलनाचो शंख फुकला.
दुसऱ्यांक वायट उतरां दिवप हें राजकारण्यांक नवें न्हय. प्रचारसभेंत तांकां टाळयोय मेळटात. आपल्या पक्षा विशीं, फुडाऱ्यां विशीं, पक्षाच्या बऱ्या कामां विशीं सांगचे परस दुसऱ्या पक्षान, विरोधी फुडाऱ्यांनी, त्या पक्षाच्या धोरणान राज्याची, देशाची कशी वाट लायली, हाचेरुय प्रचारसभेंत भर दिल्लो आसता. पत्रकार परिशदांनीय आतां तेंच जावपाक लागलां. कांय फुडारी तर ताळतंत्र नाशिल्ली टिका करतात. कमरे सकयलीं, वादग्रस्त, राष्ट्रीय फुडाऱ्यांचो अपमान करपी वाक्यां उलयतात….. इतलेंच न्हय, तर अक्षरशा गाळी पसून संवतात. आतां तंत्रज्ञान फुडारलां, म्हणटकच हे फुडारी कितें ओंकतात, तें रेकाॅर्ड जाता. शेजराच्या महाराष्ट्रांत 2- 3 फुडाऱ्यांनी कसलीं मुक्ताफळां उधळ्ळीं तीं फाटल्यां कांय म्हयन्यांनी सगल्यांनी पळयल्यांत, आयकल्यांत. बारबाला, मौत का सौदागर, गोली मारो सालों को…. हेंय सगल्यांच्या कानार गेलां. पूण सगल्यांचेरूच कारवाय जावंक ना. ती कित्याक, ताचेर दरेकल्यान आपले राजकी कुवती प्रमाण जाप सोदची. पटली तर स्विकारची, नातर सोडून दिवची. कारण राजकारणांत थोडें- भोव माफ आसता.
सुरत जिल्हो न्यायालयांतली ही केश उच्च आनी सर्वोच्च न्यायालयांतूय वतली. त्या वेळार राजकी प्रचार शुद्धीकरणाचेर निर्णय येत जाल्यार बरें जातलें. टीव्ही कॅमेऱ्या मुखार बेधडक कितेंय उलोवप, बंडलां मारप, लोकांची दिशाभूल करप, अपमान जाय सारकीं उतरां काडप हाचे आडूय न्यायालय निर्देश दिवं शकता. देशाचें पयलें मंत्रीमंडळ काडून पळोवचें. विरोधी फुडाऱ्यांची वळेरीय तपासची. एका परस एक विचारवंत, तत्वज्ञ, साहित्यीक, पंडीत त्या काळार आशिल्ले. तांच्या तोंडांतल्यान केन्ना अशीं उतरां गेलीं नात. न्यायालय आतांच बडी मारीना जाल्यार राजकी मळा वयल्या भाशणां, ट्विट हांचो दर्जो देंवत रावतलो आनी…. कोणे सांगचें, आनीक 25 वर्सांनी फुडारी एकमेकांक गाळी संवून मारामारी पसून करपाक लागत!! अशें जावंचें न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
