भांगरभूंय | प्रतिनिधी
पणजी: प्रधानमंत्री नरेंद्र मोदी हांच्या सांकवाळ हांगा जावपी आयचे (शेनवारा) सभे खातीर येरादारींत बदल केल्यात. ते प्रमाण आयज दनपारां 1 ते रातच्या 10 वरां मेरेन दाबोळी विमानतळ जंक्शन ते बिर्ला क्रॉस जंक्शन आनी बिर्ला टायटन जंक्शन ते दाबोळी विमानतळ जंक्शन हे रस्ते सगले तरेच्या येरादारी खाबीर बंद दवरतले. ह्या रस्त्यांचेर फक्त सभे खातीर येवपी वाहनांक प्रवेश दितले. राष्ट्रीय म्हामार्ग प्राधिकरणान हे विशींचो आदेश काडला.
ते प्रमाण वास्को वटेन वचपी येरादारी बिर्ला क्रॉस जंक्शन सावन शरयू टोयोटा हमरस्तो – कुठ्ठाळी जंक्शन – चिखली जंक्शन ह्या मार्गान वळयतले. जाल्यार वेर्णे उद्देगीक वसणूक, पणजी, मडगांव हांगा वचपी येरादारी दाबोळी विमानतळ जंक्शन सावन वळोवन चिखली जंक्शन – कुठ्ठाळी जंक्शन मार्गान मुखार सोडटले. ह्या काळांत वरुणापुरी जंक्शन ते बिर्ला क्रॉस जंक्शन आनी एमईएस जंक्शन ते क्वीन जंक्शन ह्या रस्त्यांचेर वाहनां थांबोवपाक वा पार्क करपाक बंदी घाल्या.
तशेंच 27 वेर राष्ट्रीय म्हामार्ग क्रमांक 566 (पोरणो राष्ट्रीय म्हामार्ग 17 ब) चेर अवजड वाहनांक बंदी घाल्या. ह्या मार्गार फक्त अत्यावश्यक म्हाल येरादारी करपी वाहनांक प्रवेश दितले.
मजगतीं, प्रधानमंत्री नरेंद्र मोदी हांची सभा आयज सांजवेळा 5 वरांचेर बिर्ला देवळा मुखा वेले सुवातेंत जातली. हे सभेक 50 हजारां परस चड प्रेक्षक हाजीर रावपा खातीर भाजपा यत्न करीत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
