भांगरभूंय | प्रतिनिधी
नगरसेवकाचे हरकती उपरांत चेक स्विकरपाचो आदेश
म्हापशें: नगरपालिकेच्या कर विभागान कराची रक्कम जमा करपा खातीर चेक स्विकारचे नात असो जारी केल्ल्या आदेशाक एका नगरसेवकान आक्षेप घेतले उपरांत विभागान भायले भायर घेतिल्लो हो आदेश फाटीं घेतलो. पूण म्हापशें पालिकेचे कर्मचारी लोकांक सेवा दितात काय त्रास दितात असो प्रस्न सत्ताधारी गटांतले नगरसेवक आशिर्वाद खोर्जुंवेंकार हांणी उपस्थीत केलो.
हालींच पालिकेच्या लेखा विभागान कराची रक्कम फक्त रोख, कार्ड आनी डिमांड ड्राफ्टानूच जमा करून घेतले असो आदेश जारी केल्लो आनी तशी नोटीस कॅश कावंटराचेर लायिल्ली. जाल्यार चेक न्हयकारताले. ताका लागून चेकान कर भरपाक आयिल्ल्या जाण्ट्या लोकांक परतून वच्चें पडटालें आनी तांकां बँकेंत वचून डिमांड ड्राफ्ट घेवचो पडटालो.
हे विशींच्यो कागाळी वेवसायीक, नगरसेवकां कडेन करताले. अश्योच कागाळी नगरसेवक खोर्जुंवेंकार हांचे कडेन आयिल्ल्यो. ताका लागून शुक्रारा 26 वेर ते आपल्या वेवसायाचो कर जमा करपा खातीर पालिकेंत चेक घेवन गेले. तांकां चेक स्विकार नात अशें कॅश कावंटरा वेल्या कर्मचाऱ्यान सांगलें.
चेक न स्विकारपा फाटलें कारण लिखीत स्वरुपांत दिवपाक ह्या कर्मचाऱ्यांनी न्हयकार दिलो. चेक हो नेगोशिएबल इन्स्ट्रूमेंट आसा ताका लागून तो न्हयकारूंक शकनात आनी ह्या प्रकारा आड आमी कागाळ करूंक शकतात. तशेंच पालिका मंडळ वा मुख्याधिकाऱ्यांनी असो आदेश दिवन लोकांक त्रास दिवपाक बी सांगलां? असो प्रस्न खोर्जुंवेंकार हांणी विचारतकच तो कर्मचारी ओगीच रावलो.
उपरांत खोर्जुंवेंकार हांणी हो प्रकार नगराध्यक्षा डॉ. नूतन बिचोलकार हांकां तशेंच मुख्याधिकारी चंद्रकांत शेटकार हांच्या कानार घालो. मुख्याधिकाऱ्यांनी आपणे कसलोच आदेश जारी केल्लो ना अशें सांगून पालिका लेखापाल स्मिता फळदेसाय हांकां हाची जाप विचारली.
चेक बावन्स जातात ताका लागून आमी तो न स्विकारपाचो निर्णय घेतला अशी जाप दितकूच मुख्याधिकारी, नगराध्यक्ष हे तांचेर तिडकले आनी तत्काळ चेक स्विकारपाचो आदेश कनिश्ठ कर्मचाऱ्यांक दिवपाचे निर्देश तांणी फळदेसाय हांकां दिले. उपरांत सांजवेळा कर विभागा कडल्यान चेक स्विकारपाक सुरवात केली. पूण कावंटराचेर लायिल्लो आदेश फलक मात काडलो ना.
चार – पांच चेक बावन्स जायत जाल्यार ताचेर कायदेशीर प्रक्रिया करूं येता. ते स्विकारपाक न्हयकारप हो ताचेर उपाय न्हय. पालिका मंडळ आनी मुख्याधिकाऱ्याच्या आदेशा बगर भायले भायर बेकायदो निर्णय घेवप योग्य न्हय. पालिका कर्मचारी हे लोकांक सेवा दिवपाक खातीर आसतात त्रास दिवपा खातीर न्हय. जर लोकांक बरी सेवा दिवंक येना जाल्यार अशा लोकांनी नोकरी सोडून घरा वच्चें. पालिकेच्या प्रशासकी कारभारांत ताळमेळ उरिल्लो ना असो आरोप नगरसेवक आशिर्वाद खोर्जुंवेंकार हांणी केलो.
पालिकेच्या कर विभागा कडल्यान चेक स्विकारनात. हाचो कर भरप्यांक त्रास जायत आशिल्ल्याचो प्रकार नगरसेवक आशिर्वाद खोर्जुंवेंकार हांणी आमचे नदरेक हाडून दिलो. उपरांत लेखापाला कडल्यान स्पश्टीकरण घेवन मुख्याधिकाऱ्यांनी चेक स्विकारपाचे निर्देश दिले. ते प्रमाण कॅश कावंटराचेर चेक स्विकारपाक सुरवात केल्या.
– डॉ. नूतन बिचोलकार, नगराध्यक्षा
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
