भांगरभूंय | प्रतिनिधी
चड तेलकट जीनस खाल्ल्यान काळजाचो आताक येवं येता. काळजाचें दुयेंस जावं येता. पचन संस्थेच्या समस्या निर्माण जावं येतात. चड मसाले, मिरसांग खाल्यार पोटांत जळटा.
आयज काल सगल्यांकूच, मागीर तो ल्हान जावं व्हड, चायनीज, मसाल्याचे, चमचमीत, डीप फ्राय केल्ले जीनस खावपाची संवयूच जाल्या. पूण हें भलायकेक घातक. मात खबर आसूनय ह्या जिनसांची क्रेझ दिसानदीस वाडतूच आसा. तश्योच लोकांच्यो भलायके विशींच्यो कागाळीय वाडत आसात. हे जीनस जिबेक सामके रुचीक लागतात. खातकूच आनीक खायन- खायन दिसता, अशें भोवतेकांचें मत. पंदरा दिसांनी हे जीनस खावप बरें, पूण सदांच न्हय. तातूंत तेलाचो वापर चड केल्लो आसता. पुरी, बटाटवडो, भजीं, मिरची, सामोसा हातूंत कसलेंच तेल वापरतात. कांय वेळार पांच, स दीस तापोवन उरिल्लें तेल पसून वापरतात. घरांत रांदतना पसून कांय बायलां चड तेल वापरतात. प्रत्येक भाजी, कांदो खूब तेल घालून तळशितात. सदांच घरच्यांक आवडटात म्हूण भजीं, बटाट्याचीं कापां, निरपणसाच्यो फोडी, केळींची कापां करून खातात. तेलांत चड प्रमाणांत लिपीड आसता, जें आमचे कुडीक सामकें हानीकारक. चड तेलकट जीनस खाल्ल्यान काळजाचो आताक येवं येता. काळजाचें दुयेंस जावं येता. पचन संस्थेच्या समस्या निर्माण जावं येतात. चड मसाले, मिरसांग खाल्यार पोटांत जळटा, अॅसिडीटी, गॅस, मोटसाण, उच्च रक्तदाब, कमी पिरायेचेर अशक्तपणा, आळस, सुस्ती जाणवता. तकली फोडटा. चड तेलकट, मसाल्याचे जीनस खाल्यार गोडेंमूत, कॅन्सर पसून जावपाचो धोको वाडटा. ओंकारी, हागवण लागूं येता. घुंवळ पसून येता. फुटपाथ, गटारां कुशीक गाडे उबे करून ताचेर केल्ले हे जीनस खावप म्हणल्यार दुयेंसांक आमंत्रण दिवप. तांचीं सारकीं नितळ नाशिल्लीं आयदनां, बश्यो, कपां, तेंच तेंच वा कसलेंय उदक वापरप, परत परत तेल तापोवन वापरप, हाताक ग्लावज घालीनासतना रांदप… असले हे जीनस खावप म्हणल्यार आपूणच आपल्या पांयांचेर फातर मारून घेवप. ह्या जिनसांचो खमंग वास म्हणजे धर्मसंकश्ट ओडून घेवप.जायते ते प्रतिश्ठीत लोक आॅफिसांतल्यान घरा येतना हातगाड्या वयले पदार्थ बोटां चोखून चोखून खातात. घरच्यांकूय पॅक करून व्हरतात. घरच्या घरा हे जीनस करुं येतात. बरें शुद्ध तेल वापरपाचें. ताचे परस सोलकडी, चपाती, भाकरी, पालेभाजी, पापड, लोणचें खावप बरें. शिवराक जेवण पसून रुचीक लागता, हें कोणें विसरचें न्हय.
– सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
