बालसाहित्याची मागणी आनी पुरवण

भांगरभूंय | प्रतिनिधी

सामान्य मनशाच्या सभावाक धरून ताका हॉटेलांत गेल्यार घराब्या खातीर जेवणाचे दोन हजार रुपया मोडपाक सहसा त्रास जायनात, भुरग्या खातीर ब्रँडेड वस्तू घेतना हजारांनी रुपया मोडपाक त्रास जायनात. पूण पुस्तकाचेर शंबर रुपया मोडपाक कितले कश्ट पडटात?

कोंकणी बालसाहित्य मनोरंजक आनी ओडलायणें करपा खातीर जायते जाण वावुरले आनी आयजूय वावुरतात. ल्हान भुरगीं
दिसलीं तशें जायत्या जाणांक तांकां बोध दिवपाची फुरफुरो येता. जांकां बालमन कळटा तीं भुरग्यां वांगडा भुरगीं जातात. आनी जेन्ना भुरगीं एकामेकां मदीं भरसल्लीं आसतात तेन्ना कोण कोणाक देख, बोध दिनात, तीं फकत मजा करतात. मजा करतना मागीर तांकां बोध मेळूं. कोंकणींतले नामनेचे बालसाहित्यीक डॉ. मनोहरराय सरदेसाय, भौ. विजयाबाय सरमळकार, भौ. पुंडलीक नायक, भौ. तुकाराम शेट, राजहंस प्रकाशनाचे जाळवणदार हांणी साचेबद्ध बालसाहित्याचो दबाव आसुनूय बालसाहित्य आनंदमयी करपा खातीर जायतो वावर केलो.
भुरगीं कार्टून पळयत रावतात, मोबायल पळयल्या शिवाय जेवनात, पुस्तक वाच म्हणल्यार आयकच नात ह्यो पालकांच्यो सदच्यो तक्रारी. पूण भुरगीं कित्या खातीर तशीं करतात हाचें मूळ आमी सोदून काडप गरजेचें. कार्टून तांकां मजा दिता. एकटीं आसतना तांकां संगत दिता. तातूंतलीं पात्रां तांचे इश्ट जातात. पालकांनी आपलें काम करतना आपल्या सोयी खातीर केल्ली तडजोड तांच्या पथार पडटा. तांकां तातूंतल्यान भायर काडपाक तितल्याच ताकदीचें माध्यम आमकां तांचे मुखार दवरचे पडटलें. म्हणटकूच आमी बालसाहित्य भुरग्यां मुखार दवरतना तांच्या आवडीचें करून दिवचें पडटलें.
भुरगीं वाचनात अशी तक्रार खूब जाणांची आसता. पूण आमचें बरें साहित्य घेवन भुरग्यां मुखार पावना हेंय तितलेंच खरें. पुस्तक प्रदर्शनांत भुरगीं, तांकां स्वातंत्र्य दिलें जाल्यार पुस्तकां चाळून आवडीच्या पुस्तकांचेर घुरी घालतात हें स्वता खूब जाणांनी अणभवलां. पूण तेंच जर तांचे पालक वांगडा आसत जाल्यार कमीत कमी खर्चांत चडांत चड पानां आशिल्लीं काणयांचीं, कवितांचीं, बडबडगितांचीं पुस्तकां सोदतात आनी भुरग्याच्या बोडार मारतात. मोल कागदाच्या पानांचें जाता. तातूंत भितर आशिल्ल्या साहित्याचें जायना. पालकांची मानसीकताय बदलपाचीय गरज आसा.
एखादें पुस्तक भुरग्याक दितना ताका सोबशीं चित्रां आसल्यार ताचें साहित्यीक मोल वाडटा. चित्रांतलो बारीक बारीक तपशील भुरग्याक आनंद दिता. पालकां खातीर त्या पानांचें मोल शुन्य आसलें तरी तींच चित्रां भुरग्यांक आपल्या कडेन आनी पुस्तकां कडेन ओडून घेवपाचें साधन थारता. पूण जेन्ना असलीं चित्रां आसपावन घेवपाचो यत्न जाता तेन्ना चित्रकाराक दिल्ल्या बिदागेक लागून पुस्तक काडप खर्चीक जाता. पुस्तकां चड खपल्यारूच प्रकाशकाक, लेखकाक आनीक पुस्तकां काडपाक बळगें मेळटा. भुरगीं आनी पुस्तकां हांचे मदीं पालक येतात, कित्याक तर तांचे पयशे तातूंत वचपाचे आसतात, आनी पुस्तकांच्या खपाक मर्यादा येतात. पूण हळू हळू ही परिस्थिती बदलतना दिश्टी पडटा. पालक जागरूक जातात आनी असल्या पुस्तकांचो खप वाडपाक लागला.
शाळेंतलीं पुस्तक प्रदर्शनां ही आडनदर जाल्ली गजाल. शाळेंत पुस्तक प्रदर्शनां घडोवन हाडल्यार दोट्टी फायदो जाता. बरीं पुस्तकां भुरग्यां मेरेन पावलीं जाल्यार प्रकाशकांक ताचो लाव खूब जाता. ताची जायरात आपशींच जाता. एक भुरगें पुस्तक वाचून दुसऱ्या भुरग्याक सांगता. दुसरी गजाल, शाळेची अर्थीक परिस्थिती बरी आसतलीच अशें नासता. वाचनालया खातीर तांकां कितलीं पुस्तकां घेवप हाचेर मर्यादा आसतात. भुरग्यांनी विकत घेतिल्लीं पुस्तकां वाचून जातकूच वाचनालयाक दान करीत जाल्यार वाचनालयांतलीं पुस्तकां वाडटलीं. भुरग्याक आपणे शाळेक भेट दिल्ल्याचें समाधान मेळटलें.
ई- कॉमर्सा वरवीं पुस्तकां पुराय संवसारभर पावतात. कितल्याश्याच प्रकाशकांनी आपलीं बालसाहित्याचीं पुस्तकां इंटरनेटार आपल्या स्वताचे व्हेबसायटी वरवीं वो ई- कॉमर्साचे व्हेबसायटी वरवीं घाल्यांत. तांकां बरो प्रतिसाद मेळटा.
बरें बालसाहित्य येवचें ही काळाची गरज. ते विशीं वातावरणूय तयार आसा. पूण कांय बरोवपी आदल्या तेंपार सावन चलत आयिल्ल्या साच्यांतूच घुस्पून उरल्यात. पूण खोशयेची गजाल म्हणल्यार खुबशे बरोवपी काळा प्रमाण आपले विचार बदलून नव्या प्रवाहांत आयल्यात. चडशे कोंकणी बरोवपी आपलें साहित्य आपुणूच प्रकाशीत करतात देखून कोंकणी बालसाहित्य उपलब्ध जावपाक आडमेळीं येतात आनी तें निरशेणीचें कारण थारता. आपणें इतलीं पुस्तकां काडलीं पूण तश्शीं पडून आसात अशें म्हणपी खूब बरोवपी आसात. प्रकाशकांनी बरें साहित्य छापलें आनी वितरणाची जापसालदारकी घेतली जाल्यार ताचो दोट्टी लाव जावपाक शकता. एकाच प्रदर्शनांतल्यान, ई- कॉमर्सा वरवीं वो आपल्या खाजगी वितरणांतल्यान सगल्या बरोवप्यांचें साहित्य भुरग्यां मुखार पावतलें, खप वाडटलो आनी दुसरो लाव म्हणल्यार प्रकाशकाचे पयश्यांची उलाढाल जातकूच ताका आनीक पुस्तकां काडपाक बळगें मेळटलें.
गोंय हें उत्सवांचें राज्य. गोंयकारांक उत्सव मनोवपाक आवडटा. भुरग्याचो वाडदीस मनयतना भुरग्याच्या मानसीकतायेचो विचार जावचे परस आवयबापायली आवड निवड मुखार आसता. कोंकणी बालसाहित्य वाडूंक जाय, ताका खप आसपाक जाय, हें जांकां दिसता, तांणी आपूण खंयच्याय वाडदिसाक वतना भुरग्याक भेट व्हरतना पुस्तकां व्हरपाक जाय. आपल्या भुरग्याचो वाडदीस मनयतना परतभेट म्हण पुस्तकां दिवपाक जाय. हाका लागून खप तर वाडटलोच, वेल्यान जायरात चड जातली. पुस्तकां भेट दिवपाची परंपरा सुरू जातली. इंग्लीश माध्यमांतल्यान शिकपी भुरग्यां लागीं एका निमतान कोंकणी पुस्तकां पावतलीं.
कोंकणी लोकूच मुळांत कमी देखून तातूंतलेच वाचक आसतले हें आमी मतींत धरपाक जाय. तातूंतल्या प्रत्येक वाचका लागीं बालसाहित्याचीं बरीं पुस्तकां पावतलीं हाची जतनाय सगल्यांनी घेतल्यारूच बालसाहित्य प्रकाशन लाव दिवपाक शकता आनी बालसाहित्य चळवळ अदीक घट जावपाक शकता.
सामान्य मनशाच्या सभावाक धरून ताका हॉटेलांत गेल्यार घराब्या खातीर जेवणाचे दोन हजार रुपया मोडपाक सहसा त्रास जायनात, भुरग्या खातीर ब्रँडेड वस्तू घेतना हजारांनी रुपया मोडपाक त्रास जायनात. पूण पुस्तकाचेर शंबर रुपया मोडपाक कितले कश्ट पडटात? पळोवपाक जायना.

चेतन आचार्य
9422389290