भांगरभूंय | प्रतिनिधी
दिगंबर कामत, आलेक्स सिक्वेरा हांचो आस्पाव जावये
पणजी: प्रधानमंत्री नरेंद्र मोदी हांच्या 11 डिसेंबराचें गोंय भोंवडे उपरांत फुडल्या चार दिसांत गोंय मंत्रीमंडळांत फेरबदल जातले. काँग्रेसींतल्यान भाजपांत आयिल्ले आमदार दिगंबर कामत आनी आमदार आलेक्स सिक्वेरा हांचो मंत्रीमंडळांत आस्पाव जातलो अशी म्हायती भाजपाच्या गोपांनी दिली.
14 सप्टेंबर 2022 दिसा दिगंबर कामत, आलेक्स सिक्वेरा, डिलायला लोबो, रुडॉल्फ फर्नांडीस, राजेश फळदेसाय, केदार नायक आनी संकल्प आमोणकार ह्या आठ आमदारांनी काँग्रेसीचो राजिनामो दिवन भाजपांत प्रवेश केल्लो. ह्या आठां मदल्या दोगांक मंत्रीपदां आनी हेरांक म्हामंडळां दिवपाचें आस्वासन भाजपाच्या केंद्रीय फुडाऱ्यांनी दिल्लें. पूण अडेज म्हयने जावन गेले तरी पदां पदरांत पडनाशिल्ल्यान तांचे मदीं अस्वस्थताय पातळिल्ली. उपरांत मुख्यमंत्री डॉ. प्रमोद सावंत हांणी काँग्रेसींतल्यान भाजपांत आयिल्ल्या कांय जाणांक मंत्रीपदां आनी हेरांक म्हामंडळां रोखडींच दितले अशें म्हणिल्लें.
आतां प्रधानमंत्री नरेंद्र मोदी हांची गोंय भोंवडी सोंपतकूच फुडल्या चार दिसांत मंत्रीमंडळांत फेरबदल जातलो. दोगांक मंत्रीपदां आनी हेरांक म्हामंडळां दिवपाचेर म्होर बसल्या अशेंय गोपांनी ‘भांगरभूंय’ कडेन उलयतना सांगलें.
मजगतीं, मंत्रीमंडळ फेरबदला वेळार खंयच्या दोन मंत्र्यांक काडटले तीं नांवां मात अजूनय भाजपान गुपीत दवरल्यांत. ताका लागून सद्याच्या मंत्र्यां मदीं लेगीत अस्वस्थताय पातळ्ळ्या अशें गोपांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
