भांगरभूंय | प्रतिनिधी
मडगांव, प्रतिनिधी : नावेले मतदारसंघांत विवीध मतदान केंद्रांचेर मतदाना खातीर लोकांच्यो रांको दिसल्यो. लोक स्वता घरा भायर सरिल्ले. लोकांनी राज्यांत आनी देशांत पायाभूत सुविधा आनी हेर उदरगतीचीं कामां पळयल्यांत. परत भाजपाचें सरकार हाडपा खातीर लोक मतदान करतात. नावेले मतदारसंघांतले लोक हे वेंचणुकेंतूय इतिहास घडयतले, अशें मत आमदार उल्हास तुयेंकार हांणी उक्तायलां.
बाणावले मतदारसंघांतल्या सातूय गांवांतल्यान लोकांनी विधानसभा वेंचणुकेंत बदल घडोवपाक मतदार सज्ज आसात. देशा खातीर, गोंयचे उदरगती खातीर लोक मुखार सरतात. हेच मतदान लोकांचे हक्क राखून दवरतात, अशें मत आमदार व्हेंझी व्हिएगस हांणी उक्तायलें.
नुवें मतदारसंघात प्रचारा वेळार कांय बरे अणभव आयले. जाल्यार कांय वायटूय आयले. नुवेचे लोक कमळ हें चिन्न स्विकारतले काय हें निकाला वेळर दिसून येतलें. कांय जाण फटींग म्हायती दिवन लोकांक भुलयतात हाका लागून वायट दिसता. सुमार स हजार मतां मेळ्ळ्यारूय आपूण समाधानी आसा, अशें आमदार आलेक्स सिक्वेरा हांणी म्हणलें.
सरदेसाय हांच्या मताक किंमत ना : कामत
लोकसभेक चड मतदान जायना. मात मडगांवां अंदूं चडांत चड ७० टक्के मतदान जावचे खातीर यत्न केल्यात. आदीं तीन वेंचणुको भाजपाच्या चिन्नाचेर लढयल्ल्यान आपल्याक कसलेच तरेची आडखळ ना. सगळ्या जातीधर्माचे मतदार आपल्या वांगडा सदांच आसात. धा हजार मतदारांचें लक्ष्य आसा. सरदेसाय हांच्या मताक आपूण किंमत दिना. तांचे वांगडा मोती डोंगराचेर गेल्ल्यांनी आपल्याक मेळून आपलें चुकलें अशें सांगलें. मडगांवां जाय तांकां उबें रावूंनी आपल्याक कांयच फरक पडना. म्हजो फुडार लोक थारायतात, अशें आमदार दिगंबर कामत हांणी सांगलें.
प्रक्रिया योग्य जाल्यार कामत हांकां राजकारण कितें तें कळटलें : सरदेसाय
आपणें फुडले पिळगे खातीर, फुडारा खातीर मतदान केलां. भाजपान पक्षांतराचें चुकीचें राजकारण केलां. लोकांच्या मनांतलो राग ह्या मतदानांतल्यान दिसतलो. फातोर्डाच्या कांय जाणांनी पल्लवी धेंपो हांकां मतदान करतले अशें सांगलें. तांकां आपणें भियनासतना मतदान करपाक सांगलां.मात मडगांवां झोपडपट्टी वाठारांतल्या लोकांचेर चेंपण आसा. ईव्हीएम मशिन आनी सगळ्यो प्रक्रिया योग्य जाल्यार राजकारण कितें हे कामत हांकां दिसतलें. कॉंग्रेसी कडेन संघटन ना हें उक्ताडार जरी आयलें तरी तांचेच वटेन लोक आसात. लोकसभेंतलें जैत हें लोकांचें जैत आसतलें, अशें आमदार विजय सरदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.