भांगरभूंय | प्रतिनिधी
मडगांव, प्रतिनिधी : समाजमाध्यमांचेर आपल्याचेर बरीच टिका जाल्या. मात आमी कोणाक कितेंच म्हणूंक ना. तांची परिस्थिती तांकां खबर आसा तशेंच म्हजी परिस्थिती म्हाका खबर आसा. मात अशे तरेन बनावट पत्रकां व्हायरल करप चुकीचें. आपणें भाजपाक फाटबळ दिलां आनी तें कित्याक दिलां हेंय स्पश्ट केलां, अशें मत आमदार आलेक्स रेजिनाल्ड हांणी उक्तायलें.
कुडतरचे आमदार आलेक्स रेजिनाल्ड तशेंच आरजीपीचे दक्षीण गोंय लोकसभा उमेदवार रुबर्ट परेरा हांचे विशीं मतदानाचे आदले राती कडेन बनावट पोस्ट समाज माध्यमांचेर व्हायरल जाले. आमदार रेजिनाल्ड हांणी भाजपाचें फाटबळ काडून आयडीसी अध्यक्षपदाचो राजीनामो दिल्ल्याचें बनावट पत्रात नमूद जाल्लें. हाचेर आमदार रेजिनाल्ड हांणी, आपल्या बनावट सये सयत एक पत्र समाजमाध्यमांचेर व्हायरल केलां. जातूंत आपणें आयडीसी अध्यक्षपदाचो राजीनामो दिवन भाजपाचें फाटबळ काडिल्ल्याचें नमूद केलां. हें बनावट पत्रक आशिल्ल्यान हाचे वरवीं विरोधक आपली बदनामी करपाचो यत्न करतात. आतां जर विरोधक असलीं कामां करीत जाल्यार फुडाराक कितें करतले हाचेर विचार जावपाक जाय. मतदारसंघांतलीं जायतीं कामां भाजपाक लागूनच जाल्यांत. जे आपणाक मजत करतात तांचे वांगडा रावपाचो संदेश आमचो धर्म आमकां दितात. मुख्यमंत्र्यां कडेन जायते फावट प्रस्न मांडल्यात. केन्नाच मुख्यमंत्र्यांनी अल्पसंख्याक म्हणून आपल्याक फाटीं दवरूंक ना. लोकांचीं सगळीं कामां केल्यांत. लोकांच्यो भावना आपल्याक खबर आसात. सगळ्यांकूच गोंय सांबाळिल्लें जाय. म्हाकाय मतदारसंघांत उदरगत जाल्ली जाय, अशेंय तांणी सांगलें.
मजगतीं, रुबर्ट परेरा गोंयच्या बर्या खातीर लोकसभा वेंचणुकेंतल्यान फाटीं सरल्या अशीं बनावट पत्रकां व्हायरल जालीं. मतदान केल्या उपरांत परेरा हांणी हे विशीं उलयतना, मतदानाचे आदले रातीं आपणें उमेदवारी फाटीं घेतल्या अशें बनावट पत्रक सोशियल मिडियाचेर व्हायर जालें. अशें फटींगपणां सांगून विरोधकांक मतां मेळोवपाची गरज कित्याक पडली? जाल्यार तांणी कांयच कामां करूंक ना. कामां करूंक नाशिल्ल्यान फटींपणाचे पोस्ट घालपाची गरज पडली. ह्या बनावट पत्रका आड कागाळ करून योग्य अशे चवकशेची मागणी करतले, अशेंय तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
