भांगरभूंय | प्रतिनिधी
गोंयच्या 16 उमेदवारांचो फुडार थारायतले 11,79,644 मतदार
भांगरभूंय । प्रतिनिधी
पणजीः लोकसभा वेंचणुके खातीर आयज तिसऱ्या पांवड्या वयलें गोंयांत मतदान जातलें. सकाळीं 7 वरांचेर सुरू जावपी मतदान सांजेच्या 6 वरांचेर सोंपतलें. उत्तर गोंय मतदारसंघांत 8 जाल्यार दक्षीण गोंय मतदार संघांत 8 मेळून 16 उमेदवार रिंगणांत आसात. तांचो फुडार वट्ट 11,79,644 मतदारांच्या हातांत आसतलो. आयज खऱ्या अर्थान मतदार हो राजा आसतलो. ह्या मतदाना संबंदांतली सगळी तयार वेंचणूक आयोगान पुराय केल्या. लोकशायेच्या ह्या म्हाउत्सवांत सगळ्या मतदारांनी वांटो घेवचो हे खातीर वेंचणूक आयोगान केलाच तसोच तो राजकी पक्षांनी लेगीत केला.
उत्तर गोंयांतल्यान भाजपाचे श्रीपाद नायक, काँग्रेसीचे अॅड. रमाकांत खलप, रिव्होल्युशनरी गोवन्स पक्षाचे (आरजीपी) मनोज परब, अखील भारतीय परिवार पार्टीचे सखाराम नायक, बसपा वतीन मिलन वायंगणकार तशेंच थॉमस फर्नांडीस, विशाल नायक आनी शकील शेख हे अपक्ष म्हूण वेंचणूक रिंगणांत आसात. दक्षीण गोंयांतल्यान भाजपाची पल्लवी धेंपो, काँग्रेसीचे कॅप्टन विरियातो फर्नांडीस, आरजीपीचे रुबर्ट परेरा, बसपाची डॉ. श्वेता गांवकार आनी अपक्ष उमेदवार दीपकुमार मापारी, हरिश्चंद्र नायक, अॅलक्सी फर्नांडीस आनी डॉ कालिदास वायंगणकार हे आठ उमेदवार रिंगणांत आसात. ह्या सगळ्यांचो फुडार मंगळारा ईव्हीएम मशिनांत बंद जातलो. वेंचणुकेचो निकाल 4 जूनाक जाहीर जातलो.
वेंचणूक आयोगान मतदान केंद्रांचेर मतदान अधिकारी आनी हेर अधिकाऱ्यांची नेमणूक केल्या. मतदाना खातीर गरजेचें साहित्य मतदान केंद्रांचेर व्हरून थंयची वेवस्था पुराय केल्या.
2019 चे लोकसभा वेंचणुकेंत गोंयांत 75 टक्के मतदान जाल्लें. त्या वेळार 80 टक्क्यां परस चड मतदान जातलें, असो विस्वास मुख्य वेंचणूक अधिकारी रमेश वर्मा हांणी उक्तायला.
चडांत चड मतदारांनी मतदान करचें आनी आपलो हक्क वापरचो, हे खातीर आयोगान फाटले कांय दीस जागृती केल्ली. तातूंत आयोगाक कितलें येस मेळटलें, हें मंगळारा सांजेच्या 6 वरां उपरांतूच स्पश्ट जातलें.
मतदार
उत्तर गोंय – 5,80,710
दक्षीण गोंय – 5,98,934
वट्ट – 11,79,644
मतदान केंद्रां
उत्तर गोंय – 863
दक्षीण गोंय – 862
वट्ट – 1,725
पिंक मतदान केंद्रां – 40
ग्रीन मतदान केंद्रां – 40
मॉडेल मतदान केंद्रां – 110
विशेश मतदान केंद्रां – 229
मतदान केंद्रांचेर मेळपी सुविधा
लिंबूपाणी, शितपेयां, थंड उदक
दिव्यांगा खातीर व्हिलचॅर
सुरक्षा वेवस्था
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.