भांगरभूंय | प्रतिनिधी
गाडी चलयतना अचकीत कोण तरी तुमच्या मुखार येता. फुडें आशिल्ली गाडी अचकीत ब्रेक मारता वा हेर जायतीं आव्हानां तुमचे मुखार येतात. अशा वेळार तुमची शिटुकसाण फायद्याची थारता. गाडयेचे ब्रेक अचकीत फेल जाल्यार कोणूय भियेता. आतां भियेंव नाकात. योग्य वेळार योग्य निर्णय घेतल्यार भिरांकूळ प्रसंगांतल्यान सहज भायर पडूं येता. हाचे खातीर कितें करचें?
सगळ्यांत पयलीं हें करचें
ब्रेक फेल जाल्यार भियेंवचें न्हय. शांत रावपाचो यत्न करात. धीर धरात. ब्रेक फेल जाल्यार हॉर्न वाजयात. हाका लागून हेर चालकांक कितें तरी गडबड आसा हें कळटलें आनी तुमचे गाडये पसून पयस रावपाचो ते यत्न करतले. ब्रेक फेल जाल्यार टॉप गियरा वयल्यान सकयल्या गियराचेर येवचें. जाका लागून गाडयेचो वेग उणो जातलो.
पार्कींग ब्रेक वापरप
तज्ञांच्या मतान ब्रेक फेल जाल्यार गियर बदलचें. मागीर पार्कींग ब्रेक ल्हवू ल्हवू लावचो. जायत्या आव्हानात्मक परिस्थितींत हो ब्रेक गाडयेचो वेग देंवोवपाक खूब आदार करता. गाडयेचीं चाकां लॉक करपाक पार्कींग ब्रेक रोखडोच वापरूं नाकात. नाजाल्यार गाडी उलटपाची भिरांत चड आसता.
हें उपाय करचे
ब्रेक फेल जाले तरी ब्रेक पेडल दामीत रावचें. ताका लागून गाडयेची गती उणी जावंक शकता. अशा वेळार गाडये वयलो हातूय सोडचो न्हय. दिका दिवपाक आनी सुरक्षीत सुवातेर पावपाक आदार जातलो. गाडयेची गती मंद जाल्यार मेकळो जागो पळोवन ती थांबवपाचो यत्न करचो. सुरक्षीत सुवात सोदून काडात. ताका लागून कोणाकच लुकसाण जावचें ना.
ही गजाल याद दवरात
गाडयेचें इंजिीन बंद करचें न्हय. ब्रेक फेल जाल्यार हें लक्षांत दवरात. इंजिन बंद पडल्यार गाडी नियंत्रणा भायर वतली. गाडयेचो वेग उणो जाल्यार गाडयेचो हँडब्रेक वापरचो. गाडयेची गती उणी जाल्यार तिका रेंवाची रास, मातयेची रासींत व्हरून मारची. अशें केल्यार तुमकां दुखापत जावची ना आनी गाडयेचें लुकसाण जावचें ना.
नेमान सर्विसिंग करात
गाडयेचे देखरेखीचेर लक्ष दिवचें. ब्रेक आदींच नेमान तपासात. ब्रेक नेमान मॅकानिकाक दाखोवचे. गाडयेचे ब्रेक फेल जाल्यार पयली ती रस्त्या कुशीक चलोवची आनी वेग उणो करपाचो यत्न करचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
