भांगरभूंय | प्रतिनिधी
पणजी : मतदान करतना वळखपत्र दाखयले बगर मतदाराक मतदान करपाक मेळना. आयज गोंयांत लोकसभा वेंचणुकेक सुरवात जाली. सकाळीं मतदाना खातीर येतना केंद्रीय मंत्री तशेंच भाजपाचे उत्तर गोंय उमेदवार श्रीपाद नायक हे वांगडा वळखपत्र घेवपाक विसरले. थंय अधिकार्यांनी तांकां वळखपत्रा विशीं विचारलें तेन्ना ते वळखपत्र दाखोवपा शकले नात. निमाणें एके गजालीक लागून तांकां मतदान करपाक दिलें.
भाजपान सेगीत सवे फावटी श्रीपाद नायक हांकां उतर गोंयची उमेदवारी दिल्या. तांचे आड कॉंग्रेसीचे ऍड. रमाकांत खलप आनी रिव्हॉल्युशनरी गोवन्सचे (आरजीपी) मनोज परब उबे आसात. सकाळच्या सत्रांत पयलीं रमाकांत खलप आनी मनोज परब हांणी मतदान केलें. उपरांत श्रीपाद नायक मतदाना खातीर केंद्राचेर पावले. मात तांचे कडेन वळखपत्र नाशिल्ले. तेन्ना नायक हांणी वेंचणूक अधिकार्यांक स्वता वेंचणूक उमेदवार आशिल्ल्याचें कार्ड दाखयलें. ताचे उपरांत तांकां मतदान करपाची परवानगी दिली. वेंचणुकेंतल्या उमेदवारांक सरकारा कडल्यान आयडी कार्ड मेळटा. हें आयडी कार्डूच तांचें वळखपत्र आसता, हो नेम आसा. ताका लागून ह्या कार्डाच्या आधारार आपणें मतदान केलें अशें नायक हांणी पत्रकारां कडेन उलयतना सांगलें.
मजगतीं, हे लोकसभा वेंचणुकेच्या मतदानाक राज्यांतल्या मतदारां कडल्यान बरो प्रतिसाद मेळटा. मतदारां मदीं उमेद निर्माण जाल्ली पळोवपाक मेळटा. ताका लागून २०१९ चे वेंचणुके परस आतांची टक्केवारी वाडटली असो विस्वास तांणी उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
