भांगरभूंय | प्रतिनिधी
‘वंदे भारत’ सेमी हायस्पीड रेल्वे सेवा सुरू
मडगाव : ‘वंदे भारत’ सेमी हायस्पीड रेल्वे फक्त आठ वरांत गोंय सावन मुंबय वतली. पूण कोंकण रेलमार्गाचें दोट्टीकरण पुराय जाले उपरांत ह्या प्रवासाक पांच वरां लागतलीं, अशें मुख्यमंत्री डॉ. प्रमोद सावंत हांणी सांगलें. रेल्वे प्रशासन हे खातीर यत्न करता अशेंय तांणी स्पश्ट केलें.
मुंबय- गोंय- मुंबय मार्गाचेर वंदे भारत रेल्वेचो प्रवास मंगळारा सावन मडगांव रेल्वे स्टेशनाचेर सुरू जालो. प्रधानमंत्री नरेंद्र मोदी हांणी व्हिडियो परिशदेच्या माध्यमांतल्यान देशांतल्या पांच मार्गांचेर वंदे भारताक ग्रीन सिग्नल दिलो. ओडिशा रेल्वे अपघाताक लागून कळाव जाल्यान आतां एक म्हयन्या भितर ही रेल्वे सुरू केल्या.
ह्या वेळार मुख्यमंत्री डॉ. सावंत, केंद्रीय मंत्री श्रीपाद नायक, खासदार विनय तेंडुलकार, पर्यटन मंत्री रोहन खंवटे, महाराष्ट्राचे मंत्री रवींद्र चव्हाण, आमदार दिगंबर कामत आनी हेर लोक हाजीर आशिल्ले.
मडगांव रेल्वे स्टेशन फायव्ह स्टार करचे अशी मागणी केंद्रीय मंत्री अश्विनी वैष्णव हांचे कडेन केल्या. कांय वर्सांनी मडगांव स्टेशनाचें रुप बदलतलें. तशेंच रेल्वे स्टेशना भायर सोबितीकरणाचें काम जीएसआयडीसी कडल्यान पुराय करतले, अशें मुख्यमंत्र्यान सांगलें.
गोंयांत खूब बदल जाल्यात. मोपा आंतरराश्ट्रीय विमानतळ, राश्ट्रीय म्हामार्ग पुराय जावपाक लागल्यात. एमपीटी वरवीं पर्यटनाक जोडणी करतलें. मोपा सुरू जातकच दाबोली विमानतळ बंद जावपाचो भंय फटीचें आशिल्लो अशें त्या वेळार सांगिल्लें. दोनूय विमानतळ चालू आसात. देशी आनी आंतरराश्ट्रीय पांवड्यार जोडणी जाल्या आनी हाचो अर्थीक उदरगती खातीर गोंयाक फायदो जातलो अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
