भांगरभूंय | प्रतिनिधी
हिंदू संघटणांची कळंगूट पुलिशेंत कागाळ
म्हापशें: कळंगूटे छत्रपती शिवाजी महाराजांचो पुतळो कुशीक काडपा संबंदी बेकायदो थाराव घेवन आदेश जारी करपा सयत धर्मीक भावना दुखोवप आनी शिवमोगींक चिथायिल्ल्याचो आरोप करून सरपंच आनी हेर दोगां पंच वांगड्यांचेर गुन्यांव नोंद करचो अशी कागाळ हिंदू संघटणांनी केल्या.
कळंगूट पुलिशेंत ही स्वतंत्र कागाळ गोंयची नारी शक्ती संस्थेच्यो संस्थापक निशा वेर्णेंकार आनी करणी सेनेचे सरचिटणीस संतोष सिंग राजपूत हांणी दिल्या. सरपंच जोजफ सिक्वेरा सयत पंच वांगडी अॅनी फर्नांडीस, सावियो गोन्साल्वीश आनी हेरां आड हेतुपुरस्सर धर्मीक भावना दुखोवप आनी शिवमोगींक चिथायिल्ल्याचो आरोप करून संबंदितांचेर गुन्यांव दाखल करचो अशी मागणी केल्या. हाका लागून शिवरायांच्या पुतळ्या वयल्यान जाल्लो वाद अजुनूय शांत जावंक नाशिल्ल्याचें दिसून येता.
ज्या येरादारी जुंव्यार छत्रपती शिवाजी महाराजांचो पुतळो उबारला, ती सुवात पंचायतीच्या मालकीची ना. तरी लेगीत पंचायती कडल्यान भायले भायर पुतळो कुशीक काडपाचो बेकायदो थाराव घेतलो. उपरांत हो पुतळो उबारपाचो आदेश जारी केलो.
हाची जाप विचारपा खातीर शिवमोगीं पंचायत कचेरेंत गेल्ले तेन्ना पुलिसांक आपोवन आदेश फाटीं घेवपाक सरपंचान टाळाटाळ केली. तशेंच आपल्या गुंडांक आपोवन पंचायत इमारतीचेर फातर शेंवटिले. ह्या गुंडांनी शिवमोगींचेर हल्लो करून जातीय दंगल चिथावपाचो यत्न केलो. तशेंच सरपंच जोजफ सिक्वेरान पंचायत कचेरेचें दार बंद करून पंचायत इमारत हायजॅक केली असो आरोप संतोष सिंग राजपूत हांणी आपले कागाळींत केला.
जाल्यार निशा वेर्णेंकार हांणी आपले कागाळेंत म्हणलां, शिवरायांचो पुतळो कुशीक काडपा संबंदी पंचायतीन काडिल्ल्या आदेशाची जाप विचारपा खातीर शिवमोगीं व्हड संख्येन पंचायत कचेरे कडेन जमिल्ले. पूण सरपंचान आपल्या गुंडांक आपोवन शिवमोगींक गाळी संवल्यो आनी शिवमोगींक भडकावपाचो यत्न केलो असो आरोप तांणी केला.
शिवराय हें हिंदू सयत सगल्यां खातीर आदर्श आनी आदाराचें स्थान आसा, आनी हेच भावनेंतल्यान हो शिवपुतळो जुंव्यार भौशीक देणगी एकठांय करून उबारला. हे खातीर पंचायतीक सुचोवणी दिल्ली असो दावो निशा वेर्णेंकारान केलो.
मजगतीं, मंगळारा पंचायत कचेरेचेर सुमार 800 परस चड जमावांनी चाल करून पंचायत मालमत्तेचें लुकसाण केल्ल्याची कागाळ हाचे पयलींच कळंगूटचे सरपंच जोजफ सिक्वेरान पुलिशेंत दिल्या. तशेंच तांणी आपले कागाळींत तीन नांवांचो उल्लेख केला.
सोशल मिडियाचेर आक्षेपार्ह मजकूर
छत्रपती शिवाजी महाराजा विशीं सोशल मिडियाचेर आक्षेपार्ह मजकूर घाले उपरांत हडफडेंच्या सान पिरायेच्या चल्यान जाहीर माफी मागल्या. बिरेस्तारा सांजवेळा ह्या चल्या आड शिवमोगींनी हणजूण पुलिशेंत कागाळ दाखल केली. पुलिसांनी ताका धरून ताब्यांत घेतलो. पूण तो सानपिरायेचो थारलो. निमाणें ताका पुलीस स्टेशनार हाडून शिवमोगींचो तशेंच सोशल मिडियाचेर समेस्त शिवमोगींची माफी मागली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
