भांगरभूंय | प्रतिनिधी
वीज खांब्यार दुरुस्ती करतना अचकींत लागलो शॉक
दिवचलः दिवचले हावसींग बोर्डांत वीज खांब्यार चडून काम करतना लायनमन मनोज वामन जांबावलीकार (34, पिळगांव) हाका मरण आयलें. दुरुस्ती कामां वेळार वीज पुरवण अचकींत सुरू जाल्ल्यान ही दुर्घटणा घडली. काल सकाळीं 11 वरांचेर ही घडणूक घडली. जाबावलीकार हांचे फाटल्यान घरकान्न आनी एक वर्सांची चली आसा.
मनोज सुमार तीन वर्सां आदीं वीज खात्यांत लायनमन म्हणून भरती जाल्लो. दिवचल वीज उपकेंद्रांत तो कामाक आशिल्लो. आयज सकाळीं तो बोर्डे- दिवचलच्या फिटनेस जिमा लागसार आशिल्ल्या खांब्यार दुरुस्ती कामां खातीर चडिल्लो. कामा खातीर वीज पुरवण पयलींच बंद केल्ली. खांब्याचेर दुरुस्तीचें काम चालू आसतना अचकीत वीज सुरू जाल्ल्यान मनोजाक शॉक लागलो. तेन्ना तो खांब्यारुच वीज सरयांचेर कोसळ्ळो आनी ताका मरण आयलें.
हे घडणुके उपरांत पुलीस आनी उजो पालोवपी दळ थंय पावले. लायनमन खांब्यार चडलो आसतना वीज पुरवण कशी सुरू जाली असो प्रस्न उप्रासलो. ह्या कारणाक लागून तिडकिल्ले पिळगांवचे नागरीक घडणूक सुवातेर आयले. मनोजाची कूड सकयल देंवोवपाक तांणी खर विरोध केलो. ह्या प्रकारच्या घडणुकेक जापसालदार आशिल्ल्यांचेर बेगोबेग कारवाय करची आनी मनोजाक न्याय दिवचो अशी मागणी तांणी केली.
ही घडणूक घडली तेन्ना सावन दनपारां 1 मेरेन मनोजाची कूड वीज खांब्यारुच आशिल्ली. पुलीस नागरिकांक समजावपाचो यत्न करताले.
अचकींत वीज पुरवण कशी सुरू जाली?
लायनमन जेन्ना दुरुस्ते खातीर वीज खांब्यार चडपाचो आसता त्या वाठारांतली वीज पुरवण बंद करतात. ट्रान्स्फॉर्मरा कडेन एक मनीस रावता वा दुरुस्ती काम करपी कामगार फ्यूज आपले वांगडा घेवन वतात. लायनमनांक सुरक्षेचीं उपकरणांय दितात. पूण, मनोज खांब्यार चडलो तेन्ना ताचे कडेन सुरक्षेचीं उपकरणां नाशिल्ली. वयर वीज पुरवण सुरू जाली. हें कशें घडलें हो प्रस्न मनोजाच्या गांवांतल्या नागरिकांनी मांडला. ह्या सगळ्या प्रकरणाची पुराय चवकशी करची अशी मागणी तांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
