भांगरभूंय | प्रतिनिधी
– खर सुरक्षा वेवस्था तैनात, 25 हजार लोकांच्या हाजेरीची शक्यताय
म्हापशेंः नव्या कदंब बसस्थानकाचेर आयज 3 मे दिसा सांजे 6 वरांचेर केंद्रीय गृह मंत्री अमीत शाह हांची जाहीर सभा जातली. हे फाटभुंयेर, बिरेस्तारा जिल्हो प्रशासन, पुलीस, सुरक्षा यंत्रणा तशेंच भाजप प्रदेशाध्यक्ष सदानंद शेट तानावडे हांणी सभा जावपाचे सुवातेची पळोवणी केली आनी सभेच्या तयारेचो नियाळ घेतलो. गोंयांत 7 मे दिसा मतदान जातलें.
उत्तर गोंय लोकसभा मतदारसंघांतल्यान भाजपाचे उमेदवारीचेर केंद्रीय पर्यटन राज्य मंत्री श्रीपाद नायक हे सवे खेपे वेंचणूक लडयतात. तांच्या प्रचारा खातीर 24 मार्चाक अमीत शाह हांची जाहीर सभा जावपाची अाशिल्ली. पूण ती फुडें धुकलिल्ली. आतां ही सभा आयज जावपाची आसा.
सभेचे सुवातेची पळोवणी केले उपरांत प्रदेशाध्यक्ष सदानंद शेट तानावडे हांणी म्हणलें, ही सभा येसस्वी करपा सयत वेवस्थापना विशीं प्रशासकीय आनी सुरक्षा अधिकाऱ्यां वांगडा सभेच्या तयारेचो नियाळ घेतला. हे सभेक 20 ते 25 हजार लोकांची हाजेरी आसतली. गोंय पुलिसां सयत सीआरपीएफच्या जवानांची सभेच्या थळार खर सुरक्षा आसतली.
मजगतीं, हे सभे खातीर 20 ते 25 हजार लोक एकठांय करून सभा येसस्वी करपा सयत शक्तीप्रदर्शन करपा खातीर भाजप पदाधिकारी, मंत्री आमदारांनी नेटान तयारी केल्या.
—————–
गृह मंत्री अमीत शाह हे महाराष्ट्राची भोंवडी करून गोंयांत दाखल जातले. मोपा विमानतळा वयल्यान ते सभेचे सुवातेर पावतले. सांजे 7 वरां मेरेन सभेक संबोधीत करपाची शक्यताय आसा. सुरक्षे खातीर गोंय पुलिसांचे 500 कर्मचारी गणभेसांत, 200 पुलीस साध्या भेसांत सभेचे सुवातेर हजर आसतले. तशेंच मोपा विमानतळ ते सभेचे सुवाते मेरेनच्या मार्गाचेर अतिरिक्त 200 पुलीस तैनात करतले. हातूंत सीआरएफ जवानांचो आस्पाव आसतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
