भांगरभूंय | प्रतिनिधी
सदानंद शेट तानावडेः बंजारा समाज परिशदेच भाजपाक तेंको
भांगरभूंय । प्रतिनिधी
म्हापशें: कर्नाटकांतले प्रज्ज्वल रेवण्णा हांचें कथीत सेक्स स्कॅण्डलाक लागून देशभर खवदळ पडला. प्रज्ज्वल रेवण्णा हे भाजपाचे न्हय. ते जेडीएसचे फुडारी. लोकसभा वेंचणूक ही राष्ट्रीय पांवड्याचेर विवीध मुद्द्यांचेर जाता. ताका लागून रेवण्णांचो विशय तांच्या थारावीक मतदारसंघा पुरतो प्रभावीत जावपाक शकता. गोंयाचेर ताचो परिणाम जावचो ना, असो दावो सदानंद शेट तानावडे हांणी केलो.
म्हापशेंच्या पक्ष कार्यालयांत आयोजीत केल्ले पत्रकार परिशदेंत ते उलयताले. ह्या वेळार उपसभापती ज्योशुआ डिसोझा, मंत्री रोहन खंवटे, आमदार केदार नायक, आदले आमदार दयानंद सोपटे आनी सिद्धार्थ कुंकळ्येकार हाजीर आशिल्ले. तानावडे हांणी सांगलें, लोकसभा वेंचणुकेचे फाटभुंयेर उत्तर आनी दक्षीण गोंयांत भाजपान प्रचाराच्यो दोन फेरयो पुराय केल्यात. आतां प्रचाराच्या निमाण्या पांवड्यार कोनसो बसका आनी जाहीर सभा जातल्यो. शुकारा 3 मेक सांजेच्या 5 वरांचेर म्हापश्या नव्या कदंब बसस्टॅण्डार गृहमंत्री अमीत शाह हांची जाहीर सभा जातली. हे सभेक 20 ते 25 हजार लोकांची उपस्थिती अपेक्षीत आसा, अशी म्हायती तांणी दिली.
विरोधकां कडेन वेळूच वेळः तानावडे
विरोधकां कडेन वेळूच वेळ आसा. ते खातीर पत्रकार परिशदो घेवन काँग्रेस उमेदवार आनी आघाडी पक्षाचे फुडारी भाजपाचेर आरोप करीत सुटल्यात. पूण आमकां वेळ ना. उदरगत आनी नेतृत्वाच्या नेटार आमी लोकांचे लक्ष पक्षा कडेन ओडून घेतात. श्रीपाद नायक आनी पल्लवी धेंपो हे दोनूय उमेदवार वेंचून येतले, असो विस्वास सदानंद शेट तानावडे हांणी उक्तायलो.
बंजारांचे भाशेक राजदरबारांत मान्यताय दिवचीः राठोड
अखील भारतीय बंजारा परिशदे वतीन म्हासचीव अॅड. पंडीत राठोड हांणी समाजाचो तेंको भाजपाक जाहीर केलो. गोंयांत 50 हजार बंजारा मतदार आसात, जाल्यार देशांत 15 कोटी बंजारा समाजाची लोकसंख्या आसा. गोंयांतल्या भाजपाच्या दोनूय उमेदवारांक आमी तेंको दितात. भाजप सत्तेर येताच सरकारान बंजारा समाजांतल्या कार्यकर्त्यांच्यो समस्या सुटाव्यो करच्यो. तशेंच बंजारा समाजाचे भाशेक राजदरबारांत मान्यताय दिवचे खातीर यत्न करचो, अशें राठोड हांणी मागलें.
‘खलपांक आरोप करपाचो अधिकार ना’
म्हापसा अर्बन बँक ही बँक अॅड. रमाकांत खलप हांची आशिल्ली. तांणी लोकांक सरसकट रीण दिलें. ह्या रिणाची पुनर्प्राप्तीची जापसालदारकी तांचीच आशिल्ली. ताका लागून खलपांक तेन्नाचें सरकार आनी मनोहर पर्रीकार हांचेर आरोप करपाचो अधिकार ना, अशें सदानंद तानावडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
