भांगरभूंय | प्रतिनिधी
इंडीयन प्रिमीयर लिगेचे (आयपीएल) 50वे मॅचींत येजमान सनरायझर्स हैदराबादान राजस्थान रॉयल्साक एके धांवडेन हारयलो. हांगाच्या राजीव गांधी आंतरराष्ट्रीय स्टेडीयमाचेर जाल्ले मॅचींत हैदराबादान 202 धांवड्यांची मोख दिल्ली. ताचो फाटलाव करतना राजस्थानान निर्धारीत 20 ओव्हरींनी 7 विकेटी व्हगडावन 200 मेरेन मजल मारली.
राजस्थान रॉयल्सान पयले ओव्हरींत दोन म्हत्वाच्यो विकेटी व्हगडावन लेगीत ताणें सनरायझर्स हैदराबादाक घाम काडलो. भुवनेश्वर कुमारान सुरवातीक एक धांवडी दिवन दोन धपके दिले. पूण यशस्वी जयस्वाल आनी रियान पराग हे जोडयेन 134 धांवड्यांची भागिदारी करून राजस्थानाचो डाव सांबाळ्ळो. पूण, हैदराबादाचो मुखेली पॅट कमिन्सान अखेरचे मॅची मेरेन मॅच व्हेली. भुवनेश्वर कुमारान निमाण्या बॉलाचेर रोव्हमॅन पॉवेलाक एलबीडब्ल्यू बाद करून हैदराबादाक उमळशीक वाडोवपी जैत मेळोवन दिलें.ते आदीं सनरायझर्स हैदराबादान पयलीं बॅटींग करपाचो घेवन लेगीत ताका अपेक्षीत सुरवात करपाक जमूंक ना. रॉजस्थान रॉयल्साच्या ट्रॅण्ट बोल्ट आनी आर आश्विन हांणी पावर प्लेंत उत्कृश्ट बॉलींग घाली. तातूंत आवेश खान आनी संदीप शर्मा हांणी पयले ओव्हरींत विकेटी घेतल्यो. अभिषेक शर्मा (12) कॅच बाद जालो आनी अनमोलप्रीत सिंग (5) अपेशी थारलो.
हैदराबादाक पावर प्लेंत 2 विकेटी व्हगडावन फकत 37 धांवड्यो करप शक्य जाल्यो. ट्रॅव्हिड हेडाची बॅट शांत दवरपाक राजस्थान रॉयल्साक येस आयलें. पूण, नितीश कुमारान मॅचीचें चित्र बदल्लें. ताणें 30 बॉलांनी अर्द शेंकड्याची खेळी केली. हेडूय उपरांत आक्रमक शॉर्ट मारतना दिसलो. ताणें 44 बॉलांनी स चवके आनी तीन सक्यांचे मजतीन 57 धांवड्यो केल्यो. आवेश खानाचे बॉलिंगेचेर बोल्ड जावचे पयलीं, संजू सॅमसनान हेडाक धांवबाद केल्लो. पूण, तिसऱ्या अंपायरान ताका नाबाद दिल्लो.
नितिशाक हॅन्रीच क्लासेनाची साथ मेळ्ळी. युजवेंद्र चहलाची तांणी बॉलींग फोडून काडली. चहलान चार ओव्हरींनी 62 धांवड्यो दिल्यो. क्लासेनान चहलाचे चवथे ओव्हरींत 16 धांवड्यो काडल्यो. नितीश लेगीत थांबपाचें नांव घेनाशिल्लो. ताणें आक्रमक शॉर्ट खेळून राजस्थानाक घाम काडलो.
नितीशान 42 बॉलांनी तीन चवके आनी आठ सक्यांचे मजतीन नाबाद 76 धांवड्यो केल्यो. क्लासेनान 19 बॉलांनी तीन चवके आनी तीन सक्यांचे मजतीन 42 धांवड्यो केल्यो आनी अशे तरेन हैदराबादाक 3 बाद 201 मेरेन मजल मारून दिली.
नितीश आनी क्लासेन हे जोडयेन 33 बॉलांनी 70 धांवड्यांची भागिदारी केली. राजस्थाना वतीन आवेश खानान दोन जाल्यार संदीप शर्मान एक विकेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
