भांगरभूंय | प्रतिनिधी
पालिका प्रशासन सुस्त; गटारां, व्हाळांची नितळसाण अजून ना
भांगरभूंय । उमेश झर्मेकार
म्हापशें: कांय दिसांनी मान्सून सुरू जातलो. म्हापशें पालिकेन शारांतली मान्सूनपूर्व नितळसाण अजून हातांत घेवंक ना. सुस्त पालिका पालिका प्रशासनाक लागून अंदूं पावसाळ्यांत म्हापश्यां हुंवारा सारकी स्थिती निर्माण जावपाची शक्यताय आसा.
म्हापशें पालिके वतीन दरवर्सा मान्सूनपूर्व नितळसाणी वरवीं शारांतलीं सगळीं गटारां नितळ करतात. तशेंच उदकास्रोत खात्या वतीन मुख्य व्हाळांतलो चिखल काडटात. शारांत 20 परस अदीक मुख्य व्हाळ आसात. हे व्हाळ म्हापशें न्हय आनी कुचेली सडयेंच्यान शापोरा न्हंयेक वचून मेळटात.
आदीं मार्च- एप्रीलांत पालिका कर्मचारी आनी कंत्राटदारा वतीन गटारांची नितळसाण करताले. तशेंच उदकास्रोत खात्याक लेखी विनवणी करून मुख्य व्हाळ लेगीत नितळ करताले. अंदूं शारांतल्या गटारांचेर आनी व्हाळांचेर व्हड प्रमाणांत अतिक्रमण जालां. खूब कडेन व्हाळ आनी गटारां मातयेचो भराव घालून पुरोवपाचे प्रकार जाल्यात. अंदूं पालिकेचें अदमासपत्रक मंजुरी सयत हेर सगळींच कामां आडावल्यांत. पालिका मंडळ आनी अधिकाऱ्यां मदीं समन्वय नाशिल्ल्यान हो प्रकार घडला. मात ह्या प्रकाराक लोकसभा वेंचणूक आचारसंहितेचें कारण दिवपाचो प्रकार पालिके कडल्यान चालू आसा.
लोकसभा वेंचणूक तोंडार पाविल्ल्यान पालिका मंडळाचे मजतीन अधिकारी वर्गान वेळार मान्सूनपूर्व नितळसाणी खातीर कंत्राट निविदा काडपाक जाय आशिल्ली. पूण हें काम जालें ना. सोपो कर आनी पे पार्कींग वसुली कंत्राट निविदेचे बाबतींत लेगीत पालिका मंडळान होच प्रकार केला.
वेंचणूक आचारसंहिता काळांत राज्य वेंचणूक अधिकाऱ्यांची मान्यताय घेवन पालिकेक आपले अदमासपत्रक मंजूर करचें पडटा. तशेंच आतां गटारांची नितळसाण करचे खातीर पालिकेक वेंचणूक अधिकाऱ्यांची मंजुरी घेवची पडल्या.
वेंचणूक अधिकाऱ्यांचे मंजुरी खातीर खूब काळ गेल्ल्यान पालिकेक आतां मान्सूनच्या तोंडार गटार नितळसाणीचें काम हातांत घेवचें पडटलें. ह्या काळांत आडवेळ्या पावसान हाजेरी लायली आनी गटारां आनी व्हाळांतलो चिखल काडलो ना जाल्यार शारांतल्या लोकांक हुंवाराक फुडो करचो पडटलो. हाचो थेट परिणाम पालिका बाजारपेठ आनी शारांतल्या सयकल्या वाठारांचेर परिणाम जातलो. पालिका मंडळ आनी पालिका अधिकारी, तशेंच चड करून अभियंता विभाग हांचे मदीं समन्वयाचो उणाव आशिल्ल्यान अंदू पयलेच खेपे शाराचेर ही परिस्थिती येतली.
डबल इंजिनाची खासियतः शशांक नार्वेकार
म्हापशेंची गटारां अजून पालिकेन नितळ करूंक नात. पालिकेच्या खंयच्याच प्रस्तावाक पालिका संचालनालया कडल्यान वेळार मान्यताय मेळना, हीच तर डबल इंजिनाची खासियत आसा. पावस तोंडार पावला, म्हापशें शार बुडपाची वाट पळयतात, असो आरोप नगरसेवक अॅड. शशांक नार्वेकार हांणी केला.
पालिकेन शारांतल्या गटारांचे नितळसाणी खातीर वेंचणूक अधिकाऱ्यांची मान्यताय घेतल्या. फुडल्या दोन- चार दिसांनी कंत्राटदाराक वर्क ऑर्डर दितले. हाका कळाव जाल्लो आसलो तरूय हें काम कंत्राटदारा वतीन गतीन करतले. तशेंच पालिका कामगारा वतीन बाजारपेठेंतलीं गटारां नितळ करपाचो विचार आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
