भांगरभूंय | प्रतिनिधी
इमारतींची रचणूक आनी नियोजन करपाच्या वावरांत वास्तुशिल्पीवा ताचे कंपनीचो वांटो आसता. तांकां जागो, भितरले भाग, लॅंडस्केप, शेजारचे प्रकल्प, शारां आनी देखून पर्यावरणाचें डिझायन करपाची संद मेळटा. सृजनशील अभिव्यक्ती, वेवसायीक वाड आनी बांदिल्ल्या वातावरणाचेर अर्थपूर्ण परिणामाचें योगदान दिवपाच्यो संदी निर्माण जातात. एक वास्तुकार बहुप्रतिभाशाली, कलात्मक तशेंच विश्लेशणात्मक, संशोधन कौशल्य आशिल्लो, पर्यावरण आनी समाजीक प्रस्नां कडेन संवेदनशील मनीस म्हणून तयार केल्लो आसता.
भारताक इतिहासीक नदरेन वास्तुशिल्पाच्या अद्भुतां खातीर, युनेस्को संवसारीक दायज थळां, देखीक हंपी, राजवाडे, किल्ले, जयपूर आनी चंडीगढ सारकिल्लीं नियोजनबद्द शारां खातीर वळखतात. स्वातंत्र्या उपरांतच्या ले कॉर्बिझियर, आर्. लुईस कान हाणें भारतीय वास्तुशिल्पकारांक प्रेरणा दिवन आनी आंतरराश्ट्रीय शैलीच्या नकाशांत भारताक म्हत्वाची सुवात मेळोवन दिवन आधुनिक भारतीय वास्तुकलेची वाट मेकळी केली.
भारतांतली सद्याची वास्तुशिल्पाची परिस्थिती प्रादेशिक शैली आनी टिकावू उदरगतीची संकल्पना हांचे कडेन झुकता. भारतीय वास्तुकलेंत बी व्ही दोशी, चार्ल्स कोरेय्या, राज रेवाल, क्रिस्टोफर बेनिंगर आनी हेर जायत्या वास्तुशिल्पींच्या योगदानाची आंतरराश्ट्रीय पांवड्यार तोखणाय जाता.
आर्किटेक्ट कसो जावचो?
आर्किटेक्ट म्हणून करिअरा खातीर काउन्सिल ऑफ आर्किटेक्चर मान्यताय प्राप्त इन्स्टिट्यूटांतल्यान वास्तुशास्त्रांत बॅचलर (बी. आर्क.) पदवी घेवची पडटा. पात्रताये खातीर भौतिकी, रसायनशास्त्र, गणित आनी नॅशनल एन एप्टीट्यूड टेस्ट इन आर्किटेक्चर (नाटा) वा जेईई मेन (पेपर 2) हातूंत 50% गूण मेळोवचे पडटात. योग्यताय चांचणी तार्कीक तर्क आनी विमर्शीक विचार करपाची तांक हांचे खातीर संज्ञानात्मक कुशळटाय, दृश्य धारणा आनी सौंदर्य संवेदनशीलताय चांचणी हांचे वरवीं मापन करतात. 2024 वर्सा, काउन्सिल ऑफ आर्किटेक्चर एप्रील ते जुलय, 2024 मेरेन सगळ्या सप्तकाच्या शेवटाक नाटा- 2024 घडोवन हाडटा. बेळगांवची गोगटे इन्स्टिट्यूट ऑफ टेक्नॉलॉजीचो आर्किटेक्चर विभाग विद्यार्थ्यांक नाटा खातीर तयारी करपा खातीर मार्गदर्शन करता.
वास्तुशास्त्रांत बॅचलर अभ्यासक्रम
वास्तुशास्त्रांत बॅचलर हो 5 वर्सांचो पदवी अभ्यासक्रम, जातूंत स्वताचो सोद, निरिक्षण, दस्तावेजीकरण, रेखाटन, अभ्यास भोंवडी, गट काम, मॉडेल तयार करप, छायाचित्रण आनी संबंदीत मनोरंजक कार्यावळी आसपावीत आसात. जाका लागून उद्देजकतेची कुशळटाय आनी व्यक्तीमत्व तयार करपाक मेळटा. विशयांत बांदकाम तंत्र, साहित्य, वास्तुशिल्प डिझायन, संरचना आनी तशेंच पर्यावरण, समाजीक- संस्कृतीक, साहित्य आनी इतिहास समजून घेवपाचे अभ्यासक्रम आसपावीत आसात. अभ्यासक्रमांत शार पातळेचे प्रस्न आनी हुस्को हाताळपाचो अणभव घेवपाक दिततात. 16 सप्तकांची इंटर्नशिप आसता. वास्तुशिल्पाची पद्दत, वैयक्तीक प्रकल्प हें प्रत्यक्ष अणभवपाक मेळटा.
परस्पर संवादात्मक शिक्षणशास्त्र
काउन्सिल ऑफ आर्किटेक्चरान स्कूल ऑफ आर्किटेक्चराक मान्यताय दिल्ली, जें डिझायन करपाचे प्रक्रियेचेर शिक्षण दिता, उद्देग-शैक्षणीक जोडणी, परस्पर संवादात्मक शिक्षणशास्त्र दिता आनी सहकार्यान शिकपा खातीर वातावरण तयार करता.
वास्तुशास्त्रांत करिअर
वास्तुशिल्पी एक तर वास्तुशास्त्र वा संबंदीत मळार काम करपाक शकतात वा पदव्युत्तर पदवी मेळोवंक शकतात. तशेंच वास्तुशिल्पी स्वतंत्र डिझायन सल्लागार फर्म सुरू करूंक शकतात. टिकावू डिझायन पद्दत, लॅंडस्केप डिझायन, दायज संवर्धन, आंतराळ डिझायन आनी अर्बन डिझायन सारकिल्या खाशेलपणाची उदरगत करप हे करिअरांत लक्ष केंद्रीत करपाक आनी स्वता मदली तज्ञताय विकसीत करपाचे कांय विशिश्ट वाठार आसात.
इत्सुक विद्यार्थ्यांनी www.git.edu वा [email protected] ह्या संकेतथळार संपर्क करचो. 0831- 2498500, 9341123755 हांकांय संपर्क करुं येता. नाटा तपशील : www.Nata.in, www.coa.gov.in
डॉ रूपाली डी. कविलकर
गोगटे इन्स्टिट्यूट ऑफ टेक्नॉलॉजी, बेळगांव
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
