भांगरभूंय | प्रतिनिधी
विरियातो फर्नांडीसः घटक राज्य, कोंकणीक राजभाशेचो दर्जो काँग्रेसीक लागून मेळ्ळो
भांगरभूंय । प्रतिनिधी
केपें: पुर्वजांनी दिल्ल्या योगदानाक लागून गोंय स्वतंत्र राज्य म्हूण उरलें. पुर्वजांनी जशें योगदान दिलें तशेंच आतां गोंयकारांनी मुखार सरून फुडले पिळगे खातीर गोंय सांबाळून दवरपाची गरज आसा. काँग्रेस पक्षाक लागुनूच गोंयाक घटक राज्याचो आनी कोंकणीक राज्यभाशेचो दर्जो मेळपाक शकलो, अशें दक्षीण गोंयचे काँग्रेसीचे उमेदवार कॅ. विरियातो फर्नांडीस हांणी सांगलें. ते भाट केप्यां कोनसो बसकेंत उलयताले.
ह्या वेळार आमदार एल्टन डिकॉस्टा, नगरसेवक फिलू डिकॉस्टा, आलिन्डा लासेन्डा, लुर्डस फर्नांडीस, आदले नगराध्यक्ष राहूल परेरा, संजील डिकॉस्टा, अॅड. जॉन फर्नांडीस, क्लायफ कुलासो आनी हेर मानेस्त हाजीर आशिल्ले.
फाटलीं 26 वर्सां आपणे देशाखातीर दिलीं, जाल्यार फुडलीं पांच वर्सां गोंयकारां खातीर वावुरतलों. आयज देश आनी राज्य सांबाळपाची गरज आसा. आपापले मतभेद कुशीक दवरून देशहिता खातीर एकठांय येवपाची गरज आसा, अशें कॅ. विरियातो हांणी सांगलें.
विरियातो हांणी 26 वर्सां देशा खातीर सेवा दिली. फाटलीं 8 वर्सां ते गोंयकारांचे विवीध प्रस्न घेवन वावुरतात. सगळ्यांनी भायर सरून फुडले पिळगे खातीर मतदान करचें. भाजप देवा- धर्माच्या नांवान विभागणी करता. राजकारणी आपल्या फायद्या खातीर लोकां मदीं विभागणी करता. काँग्रेस पक्ष सगळ्या धर्माच्या लोकांक एकवटान फुडें घेवन वचपी पक्ष आसा, अशें एल्टन डिकॉस्टा हांणी सांगलें.
भाजपा विरोधांत आशिल्ल्या सगळ्या पक्षांनी एकठांय येवन हो उमेदवार दिला. मणिपुरांत बायलांचेर अन्याय जाता, पूण मोदी एक उतर उलयना. हें सरकार आमचेर हुकूमशाय थापता. आप फुडारी अरविंद केजरीवाल, मनीष सिसोदीया हांकां बंदखणींत उडोवन सगळयांक भेश्टोवपाचो यत्न चल्ला, अशें दीसभर केपें मतदारसंघांत साबार वाठारांनी घेतिल्ले कोनसो बसकेंत कॅ. विरियातो हांणी सांगलें. आरजी पक्ष हो भाजपाची बी टीम आसा, अशें राहूल पेरेरा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
