भांगरभूंय | प्रतिनिधी
लेखा विभाग मुखेल्या सयत तीग जाणांचेर आरोप
भांगरभूंय। विशेश प्रतिनिधी
पणजी : गोवा डेरींत 2020 वर्सा गोरवां खावडीचो कच्चो म्हाल परत धाडूनय भक्ती कंपनीन नेम माड्डून केल्लो पेमेंट हो पुरायपणान बेकायदेशीर आसा. ह्या प्रकरणांत लेखा विभाग मुखेली गौरेश बायकार, लेखापाल रुक्मा बोरकार आनी संदीप गांवकार हांकां चवकशी समितीन जापसालदार धरल्यात. तेन्नाचे कार्यकारी संचालक डाॅ. अनिल फडते हेवूय जापसालदार आसात, अशेंय समितीन अहवालांत म्हणलां.
व्यवस्थापकी संचालक डाॅ. योगेश राणे हांणी डाॅ. बाळे, शहाणे आनी गिताली तळावलीकार हांची चवकशी समिती स्थापन केल्ली. तांणी हो वयलो निश्कर्श काडला.
सविस्तर म्हायती प्रमाण, भक्ती कंपनीचो म्हाल बरो नाशिल्ल्यान तो परत धाडिल्लो. मात एका वर्सा उपरांत डेरीच्या लेखा विभागान म्हालाचें लाखांनी रुपयांचें बिल गुपचूप फारीक केलें, अशी कागाळ हातुर्ले- दिवचलचे दूद उत्पादक लक्ष्मण मालवणकार हांणी केल्ली. दुबावीत एका संचालकाचो भाचो आशिल्ल्याचें तातूंत म्हणिल्लें. उपरांत सहकार निबंधकान 31 मार्च 23 क डेरीक पत्र धाडून स्पश्टीकरण मागलें. मागीर वेवस्थापकी संचालकान तिगांची समिती नेमली.
सप्टेंबर 2020 त हो पेमेंट जाल्लो. हें कळटकच तेन्नाचे प्रशासकी समितीचे चॅरमन दुर्गेश शिरोडकार हांणी गौरीश बायकार हाची बदली आनी उपरांत ताका निलंबीत केलो. मागीर चवकशी उपरांत निलंबन फाटीं घेतिल्लें. तेन्ना ताका परत लेखा विभागांत हाडपाचो यत्न एका संचालकान केल्लो, अशी म्हायती एका सुत्रान दिली. पूण ताचे पयलीं संचालक मंडळूच अपात्र थारलें. आतां गोवा डेरीची प्रशासकीय समिती चवकशी अहवाला प्रमाण संबंदीतांचेर
कितें कारवाय करता, ताचे कडेन राज्यांतल्या दूद उत्पादकांचें लक्ष लागलां.
न्हयकारिल्ल्या म्हालाचे 18 लाख केले फारीक
अहवाला प्रमाण, भक्ती कंपनीचीं सय नाशिल्लीं बिलां, गोरवां खाण कारखान्याचीं आनी डेरीच्या खरेदी विभागाचीं नोंद, सय नाशिल्लीं बिलां मेळ्ळ्यांत. ह्या बिलांची फायल सकयले कर्मचारी वरिश्ठांक धाडटात. अकावंटान तपासणी करिनासतना फायलीचेर फुडली कार्यवाही केली. ताका लागून तिचेर आनी संदीप गांवकार हांचेरुय ठपको दवरला. रिजेक्ट केल्ल्या कच्च्या म्हालाचे 18 लाख 21 हजार 520 रुपया फारीक केल्यात. पूण कंपनीच्या संगणकांत हाची नोंद ना, अशें अहवालांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
