भांगरभूंय | प्रतिनिधी
पणजी, प्रतिनिधी ः हवामान बदलांक लागून गोंयांत अंदूं काजुच्या पिकाक फटको बसला. अवकाळी पावसाक लागून काजुच्या पिकाचो हंगाम फुडें धुकल्ला आनी पिकावळय उणी जाल्या, अशें शेतकी संचालक नेव्हील आफान्सो हांणी सांगलें.
गोंय रान उदरगत म्हामंडळान ‘काजु फेस्ट 2024’ च्या निमतान कला अकादमींत काजू पिकावळीचेर तांत्रिकी सत्र घडोवन हाडिल्लें. ह्या सत्रा वेळार आफोन्सो उलयताले.
नोव्हेंबरांत सेगीत 4- 5 दीस अवकाळी पावस पडिल्ल्यान पयलो फटको बसलो. काजुची बरी पिकावळ जाय जाल्यार गरम वातावरण गरजेचें, पूण ते जावंक ना. डिसेंबर मेरेन गोंयांत शिंयाळे वातावरण आसता, पूण हे फावट जानेवारीच्या शेवटाक शिंयाळे वातावरण तयार जाले. हे दोन हवामान बदलाच्या घडणुकांक लागून काजू उत्पादनांत उशीर जालो तशेंच पिकावळय कमी जाली. सुमार 50 टक्के उणाव ह्या वेळार काजुच्या पिकावळींत दिसून आयला, अशें आफोन्सो हांणी सांगलें.
देखून उत्पादन कशें वाडोवप, आमच्या मुखार आडमेळी कितें आसात, हवामान बदलता देखून ताचेर उपाय कशें करप हाचेर चर्चा करपा खातीर काजु फेस्टाच्या निमतान तांत्रिकी सत्र घडोवन हाडलां, अशी म्हायती तांणी दिली.
पोरण्या तंत्रज्ञानाचेर संसोधन करून नवीन तंत्रज्ञान कशें तयार करप हाचेर आमी भर दितले. काजू हें गोंयचे मुखेल पीक, उपरांत नाल्लाचो नंबर लागता. गांवगिरी अर्थवेवस्था ही काजुच्या पिकांचेर निंबून आसा. जर काजुचेर परिणाम जालो जाल्यार गांवगिऱ्या वाठारांतली अर्थीक स्थिती कोसळटली. सध्या शेतकार पारंपरीक पद्दत वापरून काजूची पिकावळ काडटा. आमी काजींची कुयदाद घेनात. जेन्ना म्हुट्टे पिकतात तेन्नाच आमी काजींनी वतात. ही सैमिक पद्दत आमी वापरतात. पूण पिकावळीत वाड करतले जाल्यार सैमिक पद्दती बरोबर आमकां सारे आनी किटकनाशक हांचोय वापर करपाक जाय, अशें आफोन्स हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
