भांगरभूंय | प्रतिनिधी
शाय लायताना घाळपणा जावपाची शक्यताय
पणजी, प्रतिनिधीः मतदारांच्या हाताच्या बोटाचेर लयिल्ली शाय हात धुंवले उपरांत पुसून गेल्ल्याच्यो कागाळी कांय जाणांनी केल्यो. मतदाना दिसा शाय वचपाची चर्चा राज्यांत बरेच कडेन जाताली आनी हे खातीर बोवाळूय जालो. मुखेल वेंचणूक आयोग कार्यालय कागाळीची चवकशी करुन केंद्रीय वेंचणूक आयोगाक अहवाल सादर करतले, अशी म्हायती मुखेल वेंचणूक अधिकारी रमेश वर्मा हांणी दिली.
तिसऱ्या पावंड्यार मंगळारा 7 मेक मतदान जालें. मतदाराच्या बोटाक शाय लावपाची पद्दत आसा. ती पंधरा दिसां वयर उरता. मतदाना दिसा हात धुंवलो तरीय ही शाय वचना. बोगस मतदानाक आळाबंद घालपा खातीर शाय उरप आवश्यक थारता.
शाय वचपा विशींच्यो मुखेल वेंचणूक आयोग कार्यालया कडेन 3 कागाळी आयल्यात. राज्यांत 9 लाखा वयर मतदारांनी मतदान केलें. हातूंतल्या फकत 3 मतदारांच्या बोटा वयली शाय रोखडीच गेली. बोटाचेर शाय लायतना कर्मचाऱ्यांनी योग्य पद्दतीन ती लायिल्ली काय ना हाची तपासणी जातली अशी म्हायती मुखेल वेंचणूक अधिकारी रमेश वर्मा हांणी दिली. शाय उपलब्ध करून दिवपाचें कंत्राट म्हैसूर पेंटस कंपनीक दिल्ले. ह्या कंपनी कडेन वेंचणूक आयोग कार्यालयान अहवाल मागला. हो अहवाल आयले उपरांत राज्याचे मुखेल वेंचणूक अधिकारी, केंद्रीय वेंचणूक आयोगाक अहवाल सादर करतले, अशी म्हायती रमेश वर्मा हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
