भांगरभूंय | प्रतिनिधी
दिवचलच्या लोकांची मागणी; चंद्रकांत शेटये, प्रेमेंद्र शेट हांणी केली पळोवणी
अहवाल सादर करपाचो दिलो आदेश
दिवचल: दिवचले लोखंड वितळपी भट्टेंत बुधवारा सांजवेळा सेगीत चार स्फोट जावन खूबशा घरांक धपके बसले उपरांत थळाव्या लोकांनी ह्या फॅक्टरीचेर ताकतिकेन कारवाय करची अशी मागणी केल्या. मजगतीं, आमदार डॉ. चंद्रकांत शेट्ये, आमदार प्रेमेंद्र शेट हांणी काल सदर रोलींग मिलींत वचून पळोवणी केली आनी नियाळ घेतलो.
हाजीर आशिल्ल्या अधिकाऱ्यांनी आनी कर्मचाऱ्यांनी चर्चा केली तेन्ना तांचे कडेन कसलेच तरेचो अधिकृत दाखलो वा म्हायती नाशिल्ल्याचें समजलें. हे विशीं डॉ. चंद्रकांत शेट्ये हांणी फॅक्टरीज आनी बॉयलर तशेंच गोंय प्रदुशण नियंत्रण मंडळ हांच्या अधिकाऱ्यां कडेन संपर्क सादून थंयच्या आस्थापनाच्या एकूण कारभाराची म्हायती घेतली.
हे विशीं सदर सरकारी अधिकाऱ्यांनी हे कंपनीक कारणां दाखय नोटीस दिल्या आनी पुराय संरक्षण दिवपाक येनासत जाल्यार कारवाय करची अशी मागणी थळाव्या लोकांनी केली. हे विशीं रितसर पुलीस कागाळ तशेंच संबंदीत सरकारी अधिकाऱ्यांक लेखी निवेदन दितले अशें सांगलें.
आमदार शेट्ये हांणी हांगा भेट दिले उपरांत जे बिरेस्तारा सेगीत चार स्फोट जाले ते लोखंड वितळपाचे भट्टेंत स्फोर्ट जाल्ल्याचें सांगतात. पूण सुदैवान लोकांचो जीव वाटावलो. ताका लागून हाचे मुखार अशे तरेची बेफिकिरी सोंसून घेवचे नात. हे विशीं संबंदीत खात्याच्या अधिकाऱ्यांनी ताकतिकेन कारवाय करची अशे आदेश आपणें तांकां दिल्यात. तो मेरेन खंयच्याच प्रकारचें कामकाज सुरू करचें न्हय अशें सांगिल्ल्याचें डॉ. शेट्ये हांणी सांगलें.
आमदार प्रमेंद्र शेट हांणी लेगीत हांगा चलिल्ल्या बेभरवंशाच्या काराभारा खातीर तशेंच लोकांक गृहीत धरिल्ले खातीर तिडक उक्तावन संबंदितांक हे विशीं सगलो तपास करून एक अहवाल तयार करचो आनी हातूंत कसल्योय त्रुटी आसत जाल्यार कारवाय करपाची सुचोवणी तांणी केली.
मजगतीं, थळाव्या लोकांनी कालच्या प्रकरणाक लागून भिरांत उक्तायल्या. कसलेच तरेचो परवानो तांकां दिवचो न्हय. ह्या वाठारांतल्या लोकांच्या जिवाक धोको आसा. ताका लागून सगले तरेची खबरदारी घेवपाची मागणी ह्या वेळार लोकांनी आमदारां मुखार केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
