भांगरभूंय | प्रतिनिधी
नवी दिल्ली, खबरां संस्था: दुयेंत आशिल्ल्याचें कारण दिवन एअर इंडियाच्या कर्मचार्यांनी अचानक संप केल्लो. ताका लागून कर्मचार्यां आड कारवाय करून एअर इंडियान २५ कर्मचार्यांक काडून उडयिल्ले. मात, आतां कंपनीन दिल्ल्या आस्वासना उपरांत ह्या कर्मचार्यांनी तांचो संप फाटीं घेतला. तशेंच काडिल्ल्या २५ कर्मचार्यांक परत कामार घेवपाचें आस्वासन एअर इंडिया प्रशासनान दिलां.
मजगतीं, बुधवारी एअर इंडिया एक्सप्रेसच्या वट्ट ३०० कर्मचार्यांनी दुयेंत पडिल्ल्याचें सांगून वांगडाच सुटी घेतली. ताका लागून खुबशीं उड्डाणां रद्द जाल्लीं. तशेंच कांय विमानां उसरां उडिल्लीं. हाका लागून प्रवाशांक बरेच त्रास सोंसचे पडिल्ले. उपरांत ह्या कर्मचार्यां आड कारवाय करून २५ कर्मचार्यांक कामा वयल्यान काडपाचो निर्णय घेतिल्लो.
सुटी घेतिल्ल्या कर्मचार्यांनी कंपनीच्या वेवस्थापना कडेन कांय मागण्यो केल्ल्यो. हातूंत वेतन वाडी सयत हेर म्हत्वाचे मुद्दे हाजीर केल्ले. मात, कंपनीन हाचेर खरपणान विचार करूंक नाशिल्ल्यान ३०० कर्मचार्यांनी दुयेंत पडिल्ल्याचें सांगून एकाच दीस सुटी घेतिल्ली.
मजगतीं, बिरेस्तारा एअर इंडियाचे अधिकारी- कर्मचारी आनी मुखेल कामगार आयुक्त हांचे मदीं बसका जाली. हे बसके मजगतीं एअर इंडियान कर्मचार्यांच्या मागण्यांचेर विचार करपाचें मान्य केलें. तशेंच सगळ्या काडून उडयल्ल्या कर्मचार्यांक परत कामाचेर घेवपाचेंय आस्वासन दिलें. उपरांत कर्माचार्यांनी संप फाटीं घेतले अशेंय सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
